அந்தியூர் ஊராட்சி ஒன்றியத்தில் வளர்ச்சி திட்ட பணிகளை ஆய்வு செய்த ஆட்சியர்

அந்தியூர் ஊராட்சி ஒன்றியத்தில் வளர்ச்சி திட்டப் பணிகள்: ஈரோடு ஆட்சியர் ஆய்வு

அந்தியூர் ஊராட்சி ஒன்றியத்திற்கு உட்பட்ட பகுதிகளில் நடைபெற்று வரும் பல்வேறு வளர்ச்சித் திட்டப்பணிகளை செய்தியாளர் பயணத்தின்போது, ஈரோடு மாவட்ட ஆட்சியர் ராஜ கோபால் சுன்கரா நேற்று (28ம் தேதி) நேரில் சென்று பார்வையிட்டு, ஆய்வு மேற்கொண்டார்.

ஈரோடு மாவட்டத்தில் தமிழ்நாடு அரசின் சார்பில் பல்வேறு வளர்ச்சித் திட்டப்பணிகள் மேற்கொள்ளப்பட்டு வருகிறது. அந்த வகையில் நேற்று (28ம் தேதி) அந்தியூர் ஊராட்சி ஒன்றியம், தவிட்டுப்பாளையம் ஊராட்சியில் வேளாண்மை-உழவர் நலத்துறையின் சார்பில் ஒருங்கிணைந்த வேளாண் வளர்ச்சித் திட்டத்தின் கீழ் ரூ.2.75 கோடி மதிப்பீட்டில் ஒருங்கிணைந்த வேளாண் விரிவாக்க மையம் கட்டப்பட்டு வருவதை மாவட்ட ஆட்சியர் ராஜ கோபால் சுன்கரா நேரில் சென்று பார்வையிட்டு ஆய்வு மேற்கொண்டார்.

தொடர்ந்து, சின்னத்தம்பிபாளையம் ஊராட்சியில் அரசு ஆரம்ப சுகாதார நிலையத்தினை பார்வையிட்டு, கர்ப்பிணி தாய்மார்களின் பதிவேடுகள், மக்களைத் தேடி மருத்துவம் பதிவேடுகள் உட்பட சுகாதார நிலையத்தில் பராமரிக்கப்படும் பதிவேடுகளை பார்வையிட்டு ஆய்வு மேற்கொண்டார். மேலும், சின்னத்தம்பிபாளையம் ஊராட்சி ஒன்றிய துவக்கப்பள்ளியில் ஆய்வு மேற்கொண்டு, மாணவ, மாணவியர்களின் வருகை குறித்து கேட்டறிந்தார்.

அதனைத் தொடர்ந்து, சின்னத்தம்பிபாளையம் நியாய விலைக் கடையில் நியாய விலைப் பொருட்களின் தரம், இருப்பு, பராமரிப்படும் பதிவேடு ஆகியவற்றினை பார்வையிட்டு ஆய்வு மேற்கொண்டார். இதனையடுத்து, அந்தியூர் வட்டாரம், அத்தாணி ஆரம்ப சுகாதார நிலையத்தில் கட்டப்பட்டு வரும் வட்டார பொது சுகாதார மையக் கட்டிடத்தினை நேரில் சென்று பார்வையிட்டு, ஆய்வு மேற்கொண்டார்.

இதனைத் தொடர்ந்து, அந்தியூர் ஜீவாசெட் பகுதியில் கலைஞரின் கனவு இல்லத் திட்டத்தின்கீழ் வீடு கட்டப்பட்டு வருவதை நேரில் சென்று பார்வையிட்டு ஆய்வு மேற்கொண்டார். தொடர்ந்து, பழனியப்பா வீதி, தவிட்டுப்பாளையம், சந்தைப்பேட்டை ஆகிய பகுதிகளில் அம்ரூத் 2.0 திட்டத்தின் கீழ் ரூ.23.97 கோடி மதிப்பீட்டில் குடிநீர் மேம்பாட்டு பணியில் மேல்நிலை நீர்தேக்க தொட்டி கட்டப்பட்டு வருவதையும் பார்வையிட்டு ஆய்வு மேற்கொண்டார்.

மேலும், நெடுஞ்சாலைத்துறையின் சார்பில், கருவல்வாடிபுதூர் பகுதியில் சாலை உட்கட்டமைப்பு மேம்பாட்டு திட்டத்தின் கீழ் ரூ.2 கோடி மதிப்பீட்டில் முனியப்பம்பாளையம் -காட்டூர் சாலை வரை 90 மீ நீளத்திற்கு அணுகு சாலை அமைக்கப்பட்டு வருவதையும் நேரில் சென்று பார்வையிட்டு ஆய்வு மேற்கொண்டு, பணிகளை விரைந்து முடித்து மக்கள் பயன்பாட்டிற்கு வழங்கிட அலுவலர்களுக்கு உத்தரவிட்டார்.

இந்த ஆய்வுகளின்போது, அந்தியூர் சட்டமன்ற உறுப்பினர் ஏ.ஜி.வெங்கடாசலம், உதவி பொறியாளர் (பேரூராட்சிகள்) கணேஷ்குமார், உதவி கோட்டப் பொறியாளர் (நெடுஞ்சாலைத்துறை) ராஜேஷ்கண்ணா, அந்தியூர் வட்டாட்சியர் கவியரசு, அந்தியூர் பேரூராட்சி மன்ற தலைவர் பாண்டியம்மாள், அந்தியூர் பேரூராட்சி செயல் அலுவலர் சதாசிவம், அந்தியூர் வட்டார அரசு ஆரம்ப சுகாதார நிலைய வட்டார மருத்துவ அலுவலர் சக்தி கிருஷ்ணன் உட்பட தொடர்புடைய துறை அலுவலர்கள் உடனிருந்தனர்.

শেয়ার করুন