கோபி அருகே 2 கார்கள் மோதல்: லாரி டிரைவர் பலி: பிரேத பரிசோதனை தாமதம் - உறவினர்கள் மறியல்

ஈரோடு மாவட்டம் கோபி அருகே உள்ள கொளப்பலூர் அம்மன்கோவில் பதி பகுதியை சேர்ந்தவர் சுந்தரம் (வயது 52). லாரி டிரைவர். இவருடைய மனைவி வசந்தாமணி (46). இவர்களுக்கு யோகசித்ரா (18) என்ற மகளும், ஜோதிகரன் (17) என்ற மகனும் உள்ளனர்.

இந்த நிலையில், இவர் திருப்பூர் மாவட்டம் அவினாசியில் உள்ள உறவினர் வீட்டு திருமண நிகழ்ச்சிக்கு அம்மன் கோவில்பதியை சேர்ந்த ரவிச்சந்திரன் (52), காளியம்மாள் (55), ஈஸ்வரி (55), நவமணி (54), ஜெகநாதனின் மகள் பவிக்ஷா (9), பழனியம்மாள் (75) ஆகியோருடன் காரில் நேற்று முன்தினம் சென்றனர்.

இதைத் தொடர்ந்து, திருமணம் முடிந்ததும் இரவில் அவர்கள் அனைவரும் மீண்டும் காரில் ஊருக்கு திரும்பி வந்து கொண்டிருந்தனர். காரை சுந்தரம் ஓட்டினார். கோபியை அடுத்த கள்ளுமடை பஸ் நிறுத்தம் அருகே சென்றனர்.

அப்போது, எதிரே வந்த திங்களூர் வேப்பம்பாளையம் பகுதியை சேர்ந்த திருமலைசாமி (50), தேனி மாவட்டம் ஆண் டிப்பட்டியை சேர்ந்த பால்ராஜ் (32) ஆகியோர் வந்த காரும், சுந்தரத்தின் காரும் எதிர் பாராதவிதமாக நேருக்கு நேர் மோதிக்கொண்டன.

இதில் 2 கார்களும் பலத்த சேதம் அடைந்தன. மேலும் இந்த விபத்தில் 2 கார்களில் வந்த 9 பேரும் காயம் அடைந்தனர். உடனே அக்கம் பக்கத்தினர் காயம் அடைந்த 9 பேரையும் மீட்டு சிகிச்சைக்காக ஈரோடு மற்றும் கோபியில் உள்ள தனியார் மருத்துவமனைகளில் சேர்க்கப்பட்டனர்.

இதில் மேல் சிகிச்சைக்காக சுந்தரம் கோவையில் உள்ள தனியார் மருத்துவமனைக்கு கொண்டு செல்லப்பட்டார். ஆனால் செல்லும் வழியிலேயே சுந்தரம் பரிதாபமாக உயிரிழந்தார். இதுகுறித்து சிறுவலூர் போலீசார் வழக்குப்பதிவு செய்து விசாரணை நடத்தி வருகின்றனர்.

மேலும், கோபி அரசு ஆஸ்பத்திரியில் சுந்தரத்தின் உடல் பிரேத பரிசோதனைக்காக வைக்கப்பட்டது. இந்த நிலையில் சுந்தரத்தின் உடல் நேற்று மாலை 3.30 மணி ஆகியும் பிரேத பரிசோதனை செய்யப்பட்டு அவருடைய உறவினர்களிடம் கொடுக்கப்படவில்லை என கூறப்படுகிறது.

இதனால், அவருடைய உறவினர்கள் மற்றும் அம்மன்கோவில் பதியை சேர்ந்த பொதுமக்கள் ஆத்திரம் அடைந்து கோபி- சத்தியமங்கலம் மெயின் ரோட்டில் சாலை மறியலில் ஈடுபட்டனர்.

இதுகுறித்த தகவல் கிடைத்தும் கோபி போலீசார் சம்பவ இடத் துக்கு விரைந்து சென்று சாலை மறியலில் ஈடுபட்டவர்களிடம் பேச்சுவார்த்தையில் ஈடு பட்டனர். அப்போது போலீசார் கூறுகையில், 'பிரேத பரிசோதனை செய்யப்பட்டு உடல் விரைந்து கொடுக்க உரிய நடவடிக்கை எடுக்கப்படும்,' என்றனர்.

இதில், சமாதானம் அடைந்த பொதுமக்கள் தங்களுடைய போராட்டத்தை கைவிட்டு அங்கிருந்து கலைந்து சென்றனர். சாலை மறியல் போராட்டத்தால் அந்த சாலையில் 30 நிமிடம் போக்குவரத்து பாதிக்கப்பட்டது. இச்சம்பவத்தால் கோபியில் பெரும் பரபரப்பு ஏற்பட்டது.

Read more

ஈரோடு மாநகர் பகுதியில் போக்குவரத்து விதிமுறைகளை மீறிய 1,027 பேர் மீது வழக்கு

ஈரோடு மாநகர் பகுதியில் போக்குவரத்து விதிமுறைகளை மீறும் வாகன ஓட்டிகள் மீது போக்குவரத்து போலீசார் வழக்குப்பதிவு செய்து அபராதம் விதித்து நடவடிக்கை எடுத்து வருகின்றனர். அதன்படி ஈரோடு மாநகர் பகுதியில் கடந்த மாதத்தில் குடிபோதையில் வாகனம் ஓட்டிய 95 பேர் மீதும், ஓட்டுனர் உரிமம் இல்லாமல் வாகனம் இயக்கிய 12 பேர் மீதும், ஹெல்மெட் போடாமல் இருசக்கர வாகனத்தில் சென்ற 558 பேர் மீதும் வழக்குகள் பதிவு செய்யப்பட்டுள்ளன.

மேலும், இருசக்கர வாகனத்தில் பின்னால் ஹெல்மெட் அணியாமல் அமர்ந்திருந்த 13 பேர் மீதும், சீட் பெல்ட் அணியாமல் காரில் சென்ற 13 பேர் மீதும், செல்போன் பேசிய படி வாகனம் ஓட்டிய 36 பேர் மீதும் என மொத்தம் 1,027 பேர் மீது போலீசார் வழக்குப் பதிவு செய்து நடவடிக்கை எடுத்துள்ளனர். மேலும் இவர்களிடம் இருந்து ரூ.2 லட்சத்து 70 ஆயிரம் அபராதம் வசூல் செய்யப்பட்டது. குடிபோதையில் வாகனம் ஓட்டிய 250 பேரின் ஓட்டுனர் உரிமத்தை தற்காலிகமாக ரத்து செய்யவும் வட்டார போக்குவரத்து அலுவலர்கள் மூலம் போலீசார் நடவடிக்கை எடுத்து வருகின்றனர்.

Read more

ஈரோடு ஆயுதப்படை குடியிருப்பில் காவலர் தூக்கிட்டு தற்கொலை

ஈரோடு ஆயுதப்படை குடியிருப்பில் காவலர் தூக்கிட்டு தற்கொலை செய்து கொண்டது குறித்து போலீசார் விசாரணை நடத்தி வருகின்றனர்.

ஈரோடு மாவட்ட ஆயுதப்படையில் காவலராக பணியாற்றியவர் நவீன்குமார் (வயது 35). நவீன்குமார் பெற்றோர், மனைவி, குழந்தையுடன் ஆணைக்கல்பாளையம் காவலர் குடியிருப்பில் வசித்து வந்தார். இந்த நிலையில், நேற்று பணிக்குச் செல்லாமல் தனது வீட்டில் இருந்த அவர் மாலை தூக்கிட்டு தற்கொலை செய்து கொண்டார். 

தகவல் அறிந்து சம்பவ இடத்துக்குச் சென்ற ஈரோடு தாலுகா போலீசார், சடலத்தை மீட்டு பெருந்துறை அரசு மருத்துவக் கல்லூரி மருத்துவமனைக்கு அனுப்பி வைத்தனர். தற்கொலைக்கான காரணம் குறித்து போலீசார் விசாரணை நடத்தி வருகின்றனர்.

Read more

அம்மாபேட்டை அருகே புதிதாக அமைக்கப்பட்டு வரும் சுங்கச்சாவடியை அகற்ற வேண்டும்: தமாகாவினர் ஈரோடு ஆட்சியர் அலுவலகத்தில் மனு

அம்மாபேட்டை அருகே புதிதாக அமைக்கப்பட்டு வரும் சுங்கச்சாவடியை அகற்ற வேண்டும் என்று தமாகாவினர் ஈரோடு மாவட்ட ஆட்சியர் அலுவலகத்தில் மனு அளித்தனர்.

ஈரோடு மாவட்ட ஆட்சியர் அலுவலகத்தில், மக்கள் குறைதீர்க்கும் நாள் கூட்டம் ஆட்சியர் ராஜ கோபால் சுன்கரா தலைமையில் இன்று (மார்ச் 3ம் தேதி) நடைபெற்றது. இதற்காக மாவட்டத்தில் பல்வேறு பகுதியிலிருந்து வந்திருந்த பொதுமக்கள் தங்களது பிரச்சினைகள் குறித்த மனுக்களை ஆட்சியரிடம் வழங்கினர்.

அப்போது, தமிழ் மாநில காங்கிரஸ் கட்சி சேர்ந்த மத்திய மாவட்ட தலைவர் விஜயகுமார் தலைமையில் நிர்வாகிகள் திரண்டு வந்து ஆட்சியர் மனு கொடுத்தனர். அந்த மனுவில் அவர்கள் கூறியிருப்பதாவது:-

ஈரோடு மாவட்டம் அம்மாபேட்டை வட்டம் மேட்டூர் சாலையில் புதிதாக சுங்கச்சாவடியை அமைக்கும் பணியில் ஈடுபட்டு வருகிறார்கள். மேட்டூர், குளத்தூர், மேச்சேரி போன்ற பகுதியில் இருந்து அன்றாடம் மக்கள் பவானி மற்றும் ஈரோடு பகுதிக்கு வேலைக்காகவும் பயன்படுத்தி வருகின்றார்கள்.

மேலும், விவசாய பொருட்கள் கொண்டு செல்லவும்,பள்ளி, கல்லூரி மற்றும் மருத்துவமணைக்கு செல்லவும் அந்தப் பகுதியை சுற்றியுள்ள ஆயிரக்கணக்கான ஏழை எளிய மக்கள் அச்சாலையை பயன்படுத்துகிறார்கள்.

இந்த சாலை விரிவாக்க பணிகளோ, நான்கு வழி சாலைகளோ போடப்படாமல் அந்தப் பகுதியில் சுங்கச்சாவடி அமைத்து வருகிறார்கள். மத்திய மாநில அரசு உடனடியாக தலையிட்டு அதை தடை செய்ய வேண்டும் என கேட்டுக்கொள்கிறோம்.இவ்வாறு அவர்கள் அதில் கூறியுள்ளனர்.

மாநில பொதுச் செயலாளர் யுவராஜா, மூத்த தலைவர் ஆறுமுகம், மாநிலச் செயற்குழு உறுப்பினர் எஸ் டி சந்திரசேகர், வட்டார தலைவர்கள் உட்பட பலர் உடனிருந்தனர்.

Read more

ஈரோட்டில் மக்கள் குறைதீர் கூட்டத்தில் பொதுமக்களிடம் இருந்து மனுக்களை பெற்று, பயனாளிகளுக்கு நலத்திட்ட உதவி வழங்கிய ஆட்சியர்

ஈரோட்டில் இன்று (மார்ச் 3) நடந்த மக்கள் குறைதீர்க்கும் நாள் கூட்டத்தில் பொதுமக்களிடமிருந்து கோரிக்கை மனுக்களை பெற்று, பயனாளிகளுக்கு அரசு நலத்திட்ட உதவிகளை மாவட்ட ஆட்சியர் ராஜ கோபால் சுன்கரா வழங்கினார்.

ஈரோடு மாவட்ட ஆட்சியரக கூட்டரங்கில், வாராந்திர மக்கள் குறைதீர்க்கும் நாள் கூட்டம் மாவட்ட ஆட்சியர் ராஜ கோபால் சுன்கரா தலைமையில் நடைபெற்றது. இக்குறைதீர்க்கும் நாள் கூட்டத்தில் வீட்டுமனை பட்டா, கலைஞர் மகளிர் உரிமைத்தொகை, பட்டா உட்பிரிவு, மாற்றுத்திறனாளிகள் உதவித்தொகை, ஆக்கிரமிப்புகள் அகற்றுதல், சாலை வசதி, வடிகால் வசதி மற்றும் காவல் துறை நடவடிக்கை உள்ளிட்ட பல்வேறு கோரிக்கைகள் குறித்து மொத்தம் 223 மனுக்கள் வரப்பெற்றன.

பொதுமக்கள் அளித்த பல்வேறு கோரிக்கை மனுக்களை மாவட்ட ஆட்சியர் பெற்று உரிய துறை அலுவலர்களிடம் வழங்கி அவற்றின் மீது உடனடி நடவடிக்கை எடுத்திட உத்தரவிட்டார். மேலும், முதலமைச்சர் தனிப்பிரிவு மனுக்கள், மக்கள் குறைதீர்க்கும் நாள் கூட்டத்தில் பெறப்பட்ட மனுக்கள் மீது மேற்கொள்ளப்பட்ட நடவடிக்கைகள் குறித்து ஆய்வு மேற்கொண்டார்.

இதைத் தொடர்ந்து, இக்கூட்டத்தில் மாவட்ட மாற்றுத்திறனாளிகள் நலத்துறையின் சார்பில் 4 மாற்றுத்திறனாளிகளுக்கு தலா ரூ.3 ஆயிரத்து 285 வீதம் ரூ.13 ஆயிரத்து 140 மதிப்பீட்டில் காதொலி கருவிகளை வழங்கினார்.

இக்கூட்டத்தில், மாவட்ட வருவாய் அலுவலர் சாந்த குமார், உதவி ஆட்சியர் (பயிற்சி) ராமகிருஷ்ணசாமி, தனித்துணை ஆட்சியர் (ச.பா.தி) செல்வராஜ், மாவட்ட ஆதிதிராவிடர் மற்றும் பழங்குடியினர் நல அலுவலர் ராஜகோபால், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் சக்திவேல், மாவட்ட மாற்றுத்திறனாளிகள் நல அலுவலர் பூபதி, துணை ஆட்சியர் (பயிற்சி) சிவபிரகாசம் உட்பட அனைத்துத்துறை அலுவலர்கள் கலந்து கொண்டனர்.

Read more

12ம் வகுப்பு பொதுத்தேர்வு: ஈரோடு ஆட்சியர் ஆய்வு

ஈரோடு மாவட்டத்தில் இன்று (மார்ச் 3) தொடங்கிய 12ம் வகுப்பு பொதுத்தேர்வை மாவட்ட ஆட்சியர் ராஜ கோபால் சுன்கரா ஆய்வு செய்தார்.

ஈரோடு மாவட்டத்தில் 12ம் வகுப்பு பொதுத்தேர்வு இன்று (மார்ச் 3) தொடங்கியது. இதைத் தொடர்ந்து, குமலன்குட்டை அரசு மேல்நிலைப்பள்ளியில் மாவட்ட ஆட்சியர் ராஜ கோபால் சுன்கரா நேரில் பார்வையிட்டு, ஆய்வு மேற்கொண்டார்.

பின்னர், அவர் தெரிவித்ததாவது, ஈரோடு மாவட்டத்தில் 12ம் வகுப்பு அரசு பொது தேர்வு இன்று (மார்ச் 3) துவங்கி வரும் 25ம் தேதி வரை நடைபெறுகிறது. இத்தேர்வினை 223 பள்ளிகளைச் சேர்ந்த 22,540 மாணவ, மாணவியர்களும், தனித்தேர்வர்கள் 234 மாணவ, மாணவியர்களும் எழுதுகின்றனர்.

இதில், இன்று 22,287 மாணவ, மாணவியர்களும், 5 தமிழ் பாட விலக்கு (தமிழ் மொழி அல்லாத பாடப்பிரிவு) மாணவ, மாணவியர்களும், 164 தனித்தேர்வர்களும் எழுதினர். இதில் 437 சலுகைகள் பெற்று தேர்வு எழுதும் மாணவ, மாணவியர்களும் தேர்வு எழுதியுள்ளனர்.

இத்தேர்விற்கு 108 தேர்வு மையங்களில் அமைக்கப்பட்டுள்ளது. மேலும் 4 வினாத்தாள் கட்டுக்காப்பு மையங்களும், தனித் தேர்வர்களுக்கு 5 தனித் தேர்வு மையங்களும் அமைக்கப்பட்டுள்ளது.

இத்தேர்விற்கு மாணவ, மாணவியர்கள் செல்லும் வகையில் 6 மலைப்பகுதி வழித்தடம் உட்பட 27 வழித்தடங்கள் அமைக்கப்பட்டுள்ளது. 4 விடைத்தாள் சேகரிப்பு மைங்களும், 3 விடைத்தாள் திருத்தும் மையங்களும் அமைக்கப்பட்டுள்ளது.

மேலும் இத்தேர்விற்கு 108 முதன்மைக் கண்காணிப்பாளர்கள், துறை அலுவலர்களும் மற்றும் 170 பறக்கும் படை உறுப்பினர்களும் நியமிக்கப்பட்டுள்ளனர்.

இதனைத் தொடர்ந்து, ஈரோடு மாவட்டத்தில் மார்ச் 5ம் தேதி முதல் 27ம் தேதி வரை 11-ம் வகுப்பு பொதுத்தேர்வும், மார்ச் 28ம் தேதி முதல் ஏப்ரல் 15ம் தேதி வரை 10-ம் வகுப்பு பொதுத்தேர்வும் நடைபெறவுள்ளது.

மேலும், பல்வேறு துறை அலுவலர்களைக் கொண்ட ஒருங்கிணைப்புக்குழு அமைக்கப்பட்டு 10, 11, மற்றும் 12ம் வகுப்பு அரசு பொது தேர்வு எழுதும் மாணவ, மாணவியர்களுக்குத் தேவையான குடிநீர் வசதி, கழிப்பிட வசதி, போக்குவரத்து வசதி, தடையில்லா மின்சார வசதி, மருத்துவ வசதி மற்றும் காவல்துறை சார்பில் உரிய பாதுகாப்பு வசதிகள் ஏற்பாடு செய்யப்பட்டுள்ளது என்றார்.

Read more

ஈரோடு மாநகராட்சிக்குட்பட்ட பகுதிகளில் நகராட்சி முதன்மை செயலாளர் ஆய்வு

ஈரோடு மாநகராட்சிக்குட்பட்ட பகுதிகளில், நகராட்சி நிர்வாகம் மற்றும் குடிநீர் வழங்கல் துறை அரசு முதன்மை செயலாளர் தா.கார்த்திகேயன், மாவட்ட ஆட்சியர் ராஜ கோபால் சுன்கரா முன்னிலையில் கள ஆய்வு மேற்கொண்டார்.

இந்த ஆய்வின் போது, ஈரோடு சோலார் பகுதியில் ரூ.63.50 கோடி மதிப்பீட்டில் புதியதாக கட்டப்பட்டு வரும் பேருந்து நிலையம் பணிகளை அவர் நேரில் சென்று பார்வையிட்டு, ஆய்வு மேற்கொண்டு பணியினை விரைவாக முடித்து பொதுமக்களின் பயன்பாட்டிற்கு கொண்டு வருமாறு அலுவலர்களுக்கு அறிவுறுத்தினார்.

தொடர்ந்து, சோலார் பகுதியில் ரூ.18.48 கோடி மதிப்பீட்டில் புதியதாக ஒருங்கிணைந்த காய்கறி மற்றும் மளிகை வளாகம் அமைக்க முதற்கட்ட பணிகள் நடைபெற்று வருவதை அவர் பார்வையிட்டு ஆய்வு செய்தார்.

மேலும், ஈரோடு மாநகராட்சி சீர்மிகு நகரத்திட்டத்தின் கீழ் பெரும்பள்ளம் ஓடையை மேம்படுத்தும் பணி ரூ.26.60 கோடி மதிப்பீட்டில் மேற்கொள்ளப்பட்டு வருவதையும் அவர் நேரில் சென்று பார்வையிட்டு, ஆய்வு மேற்கொண்டு பணிகளை விரைந்து முடித்து, மக்களின் பயன்பாட்டிற்கு கொண்டு வர அலுவலர்களுக்கு அறிவுறுத்தினார்.

இந்த ஆய்வுகளின் போது, உதவி ஆட்சியர் (பயிற்சி) ராமகிருஷ்ணசாமி, ஈரோடு மாநகராட்சி ஆணையர் தனலட்சுமி, நகர்நல அலுவலர் மரு.கார்த்திகேயன், மாநகராட்சி பொறியாளர் விஜயகுமார், உதவி செயற்பொறியாளர் ஆனந்தன் உட்பட தொடர்புடைய துறை அலுவலர்கள் உடனிருந்தனர்.

Read more