பவானிசாகர் அருகே ஊராட்சி தலைவர், துணைத் தலைவர் செக் பவர் ரத்து: செயலாளர் சஸ்பெண்ட்

ஈரோடு மாவட்டம், பவானிசாகர் அருகே கொத்தமங்கலம் ஊராட்சித் கொக்கரக்குண்டி கிராமத்தைச் சேர்ந்தவர்கள் கனகராஜ், ரவிச்சந்திரன். விவசாயிகளான இவர்களிடம் தோட்டத்திற்கு குடிநீர் குழாய் பதிக்க தடையில்லா சான்று வழங்க ரூ.2.40 லஞ்சம் வாங்கும் போது, கொத்தமங்கலம் ஊராட்சித் தலைவர் மல்லிகா (வயது 55), துணைத் தலைவர் சண்முகம் (வயது 44), ஊராட்சி செயலர் ராஜூ (வயது 54) ஆகிய மூன்று பேர் லஞ்ச ஒழிப்புத்துறை போலீசாரால் கைது செய்யப்பட்டனர்.

அதனைத் தொடர்ந்து, ஈரோடு நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர். இதையடுத்து, ஊராட்சி தலைவர் மல்லிகா, துணைத் தலைவர் சண்முகம் ஆகியோர் காசோலையில் கையெழுத்திடும் அதிகாரத்தை ரத்து செய்து ஈரோடு மாவட்ட ஆட்சியர் ராஜ கோபால் சுன்கரா உத்தரவிட்டுள்ளார். மேலும், லஞ்சம் பெற்ற விவகாரத்தில், ஊராட்சி செயலாளர் ராஜூவை தற்காலிக பணி நீக்கம் செய்து பவானிசாகர் வட்டார வளர்ச்சி அதிகாரி விஜயலட்சுமி உத்தரவிட்டார்.

இதனைத் தொடர்ந்து, ஊராட்சி தலைவருக்கு பதிலாக பவானிசாகர் வட்டார வளர்ச்சி அலுவலர் (கிராம ஊராட்சி), துணைத் தலைவருக்கு பதிலாக மண்டல துணை வட்டார வளர்ச்சி அலுவலர் ஆகியோருக்கு ஊராட்சி நிர்வாகத்தை கையாளும் அதிகாரம் வழங்கும் உத்தரவை மாவட்ட ஆட்சியர் ராஜ கோபால் சுன்கரா பிறப்பித்துள்ளார்.

শেয়ার করুন