ஈரோட்டில் சரக்கு வாகனத்தில் ரத்த காயங்களுடன் மர்மமான முறையில் இறந்து கிடந்த நபரின் உடலால் பரபரப்பு

ஈரோடு வ.உ.சி பார்க் அருகே சரக்கு வாகனத்தில் கழுத்தை அறுத்து கொலை செய்யப்பட்ட நிலையில் வாலிபரின் சடலம் மீட்கப்பட்டதால் அப்பகுதியில் பெரும் பரபரப்பு ஏற்பட்டுள்ளது ...  சடலத்தை மீட்ட ஈரோடு வடக்கு காவல் நிலைய போலீசார் தீவிர விசாரணை ..!

ஈரோடு வ.உ.சி பூங்கா பெரிய காய்கறி மார்க்கெட்டுக்கு நாள் ஒன்றுக்கு நூற்றுக்கும் மேற்பட்ட வாகனங்கள் பல்வேறு வெளி மாவட்டம், வெளி மாநிலங்களில் இருந்து காய்கறி லோடுகளை ஏற்றி வருகின்றன. பின்னர் லோடுகளை இறக்கி விட்டு, வாகனத்தில் வருபவர்கள் வ.உ.சி பூங்கா பின்புறம் உள்ள சாலையோரம் வாகனங்களை நிறுத்தி தூங்குவது வழக்கம்.

அதைப்போல் நேற்று இரவு கர்நாடகா மாநிலம் சாம்ராஜ் நகரில் இருந்து ஒரு மினி சரக்கு வாகனம் தக்காளி லோடுகளை  ஏற்றிக்கொண்டு, ஈரோடு வ.உ.சி பூங்கா பெரிய மார்க்கெட்டிற்கு வந்தது. மினி சரக்கு வாகனத்தை கர்நாடகா மாநிலத்தை சேர்ந்த மனோஜ் (32) என்பவர் ஓட்டி வந்தார். 

பின்னர் அவர் தக்காளி லோடுகளை மார்க்கெட்டில் இறக்கிவிட்டு வ உ சி பூங்கா பின்புறம் உள்ள சாலையோரம் தனது வாகனத்தை நிறுத்தி, வாகனத்தின் முன் பகுதியில் தூங்கினார். 

இன்று காலை அந்த வழியாக சென்ற பெண் ஒருவர், மனோஜை எழுப்பி உன் வாகனத்தின் பின்பகுதியில் ஒருவர் இறந்து கிடப்பதாக கூறினார். 

இதைக் கேட்டு அதிர்ச்சி அடைந்த மனோஜ் பின்னால் சென்று பார்த்தபோது 35 வயது மதிக்கத்தக்க ஆண் ஒருவர் கழுத்து அறுபட்ட நிலையில் ரத்த வெள்ளத்தில் இறந்து கிடந்தார். 

இதனை பார்த்து அதிர்ச்சி அடைந்த அவர், இது குறித்து ஈரோடு வடக்கு காவல் நிலைய  போலீசாருக்கு தகவல் தெரிவித்தார். 

வ உ சி பூங்காவில் நடை பயிற்சி சென்றவர்கள், காய்கறி வாங்க சென்றவர்கள் அந்த மினி சரக்கு வாகனத்தின் அருகே குவிய தொடங்கினர். நேரம் செல்ல செல்ல கூட்டம் அதிகமானது. 

சம்பவ இடத்துக்கு விரைந்து வந்த போலீசார் இறந்து கிடந்த நபரின் சடலத்தை மீட்டு பிரேத பரிசோதனைக்காக ஈரோடு அரசு தலைமை மருத்துவமனைக்கு  வைத்தனர். கழுத்து அறுக்கப்பட்ட நிலையில் கொலை செய்து கிடந்த நபர் யார்? எந்த ஊரைச் சேர்ந்தவர்? போன்ற விவரம் தெரியவில்லை. கழுத்து அறுபட்ட நிலையில் இருப்பதால் அவரை மர்ம கும்ப கும்பல் கொலை செய்து வாகனத்தில் போட்டு சென்றதா? அல்லது அந்த நபர் தனக்குத்தானே கழுத்தை அறுத்து தற்கொலை செய்து கொண்டாரா? எனவும் ஈரோடு வடக்கு காவல் துறையினர் வழக்குப்பதிந்து தீவிர விசாரணை மேற்கொண்டு வருகின்றனர்,

மேலும், அந்தப் பகுதியில் பொருத்தப்பட்டிருக்கும் சி.சி.டி.வி. கேமரா காட்சிகளையும் ஆய்வு செய்து வருகின்றனர். ஈரோட்டில் மிகவும் பரபரப்பாக இயங்கிக் கொண்டிருக்கும் பிரதான பகுதியில் நடந்த இந்த கொலை சம்பவத்தால் மக்கள் கூட்டம் கூடி பெரும் பரபரப்பு ஏற்பட்டு உள்ளது.

শেয়ার করুন