ஈரோடு மாவட்ட ஆட்சியர் அலுவலக கூட்டரங்கில், விவசாயிகள் குறைதீர்க்கும் நாள் கூட்டம், மாவட்ட ஆட்சித்தலைவர் ராஜ கோபால் சுன்கரா இன்று (30ம் தேதி) தலைமையில் நடைபெற்றது.
இந்தக் கூட்டத்தில் மாவட்ட ஆட்சியர் ராஜ கோபால் சுன்கரா தெரிவித்ததாவது, ஈரோடு மாவட்டத்தின் இயல்பான ஆண்டு சராசரி மழையளவு 733.44 மிமீ ஆகும். நடப்பு ஆண்டில் 30.08.2024 முடிய 385.33 மி.மீ பெய்துள்ளது. பவானிசாகர் அணையின் நீர்மட்டம் தற்போது 96.85 அடியாகவும், 26.33 டி.எம்.சி நீர் இருப்பும் உள்ளது.
நடப்பாண்டில் வேளாண்மை விரிவாக்க மையங்களில் விநியோகம் செய்வதற்காக நெல் விதைகள் 309 மெட்ரிக் டன்னும், சிறுதானியங்கள் 103 மெட்ரிக் டன்னும், பயறுவகைகள் 96 மெட்ரிக் டன்னும், எண்ணெய் வித்துக்கள் 278 மெட்ரிக் டன்னும் இருப்பு வைக்கப்பட்டுள்ளன. இரசாயன உரங்களான யூரியா 6290 மெட்ரிக் டன்னும், டி.எ.பி 1342 மெட்ரிக் டன்னும், பொட்டாஷ் 2511 மெட்ரிக் டன்னும் மற்றும் காம்ப்ளக்ஸ் 14511 மெட்ரிக் டன்னும் இருப்பில் உள்ளது. நடப்பு பருவத்திற்கு தேவையான இடுபொருட்கள் போதுமான அளவு இருப்பில் உள்ளன.
2024-25-ஆம் ஆண்டில் கலைஞரின் அனைத்து கிராம ஒருங்கிணைந்த வேளாண் வளர்ச்சி திட்டமானது தேர்வு செய்யப்பட்ட 42 கிராம ஊராட்சிகளில் செயல்படுத்தப்பட்டது. இந்த ஊராட்சிகளில் உள்ள தரிசு நிலங்கள் கண்டறியப்பட்டு அவற்றை சாகுபடிக்கு கொண்டுவந்து உணவு தானிய உற்பத்தியை அதிகரிக்கும் பொருட்டு வேளாண்மை, தோட்டக்கலை மற்றும் வேளாண்மை பொறியியல் துறையின் மூலம் நடவடிக்கை எடுக்கப்பட்டு வருகிறது.
வேளாண்மைத்துறையின் மூலம் தரிசு நிலத்தொகுப்புகள் கண்டறியப்பட்டு அவற்றில் ஆழ்குழாய் கிணறுகள் அமைக்கும் பொருட்டு நிலத்தடி நீர் ஆய்வு செய்யப்பட்டு ஆழ்குழாய் கிணறுகள் அமைத்து, நுண்ணீர் பாசன அமைப்பை நிறுவி பயிர்சாகுபடிக்கு கொண்டு வர நடவடிக்கை எடுக்கப்பட்டு வருகிறது.
தடப்பள்ளி அரக்கன்கோட்டை பாசன பகுதிகளுக்கு நெல் சாகுபடிக்காக நீர் திறக்கப்பட்டு தற்போது நடவு பணிகள் முடிவுற்று மற்றும் கீழ்பவானி மற்றும் காலிங்கராயன் பாசன வாய்க்கால்களில் தண்ணீர் திறந்துவிடப்பட்டதை தொடர்ந்து விவசாயிகளுக்கு தேவையான இடுபொருட்கள் அந்தந்த பகுதிகளில் உள்ள வட்டார மற்றும் துணை வட்டார வேளாண்மை விரிவாக்க மையங்களில் இருப்பு வைக்கப்பட்டுள்ளன விவசாயிகள் இவற்றைப் பெற்று பயன்பெறலாம்.
மேலும் விவசாயிகளுக்கு தேவையான பூச்சி மருந்துகள் மற்றும் இரசாயன உரங்கள் போதுமான அளவு தனியார் மற்றும் கூட்டுறவு சங்கங்களில் இருப்பு வைக்கப்பட்டு விநியோகம் செய்யப்பட்டு வருகிறது எனத் தெரிவித்தார்.
அதனைத் தொடர்ந்து, விவசாயிகளிடம் எல்.பி.பி இணைப்பு வாய்க்காலில் கடைமடை வரை தண்ணீர் வர நடவடிக்கை மேற்கொள்ள வேண்டும், மலைப்பகுதிகளில் சாலைகளை மேம்பாடு செய்தல், அனைத்து பகுதிகளிலும் பயிர் ஆய்வு செய்ய வேண்டும், அனைத்து உரங்களும் தட்டுப்பாடின்றி கிடைத்திட நடவடிக்கை மேற்கொள்ள வேண்டும் உள்ளிட்ட 120 கோரிக்கை மனுக்களை பெற்றுக் கொண்டு, அதன் மீது உரிய நடவடிக்கை மேற்கொள்ள தொடர்புடைய அலுவலர்களுக்கு அறிவுறுத்தினார்.
மேலும், விவசாயிகள் குறைதீர்ப்பு நாள் கூட்டத்தில் கீழ்பவானி முறைநீர் பாசன விவசாயிகள் சபை விவசாயிகள் வயநாடு நிலச்சரிவில் பாதிக்கப்பட்டவர்களுக்காக ரூ.1 லட்சத்திற்கான காசோலையினை வழங்கினர்.
இக்கூட்டத்தில், மாவட்ட வருவாய் அலுவலர் சு.சாந்த குமார், வேளாண்மை இணை இயக்குநர் எஸ்.வெங்கடேசன், மாவட்ட ஆட்சியரின் நேர்முக உதவியாளர் (வேளாண்மை) மா.சாந்தாமணி, செயற்பொறியாளர் (வேளாண் பொறியியல்) மனோகரன், துணை இயக்குநர் (தோட்டக்கலை) மரகதமணி, துணை இயக்குநர் (வேளாண்வணிகம்) வி.சி.மகாதேவன், செயலாளர் / துணை இயக்குநர் (ஈரோடு விற்பனைக்குழு) சாவித்திரி, கூட்டுறவு சங்கங்களின் இணை பதிவாளர் ராஜ்குமார், நீர்வள ஆதாரதுறை செயற்பொறியாளர்கள் ஈரோடு மற்றும் பவானிசாகர் அணை கோட்டம் மற்றும் வருவாய்துறை அலுவலர்கள், தமிழ்நாடு மின்சார வாரிய அலுவலர்கள், தமிழ்நாடு மாசுகட்டுப்பாடு வாரிய அலுவலர்கள் உட்பட பிற துறைகளை சார்ந்த அலுவலர்கள், விவசாயிகள் மற்றும் விவசாய சங்க பிரதிநிதிகள் ஆகியோர் கலந்து கொண்டனர்.
