ஈரோடு: தம்பதியை கொன்றவர்களை கைது செய்யாவிட்டால் சிவகிரியில் 20ம் தேதி முதல் தொடர் உண்ணாவிரத போராட்டம்; அண்ணாமலை அறிவிப்பு!

ஈரோடு மாவட்டம் சிவகிரி அருகே தம்பதி படுகொலை செய்யப்பட்டதை கண்டித்து, நேற்று மாலை சிவகிரியில் பா.ஜனதா கட்சி சார்பில் கண்டன ஆர்ப்பாட்டம் நடைபெற்றது. இதில் கட்சியின் முன்னாள் மாநில தலைவரும், தேசிய பொதுக்குழு உறுப்பினருமான அண்ணாமலை கலந்து கொண்டு பேசினார். 

அப்போது, அவர் கூறியதாவது, சிவகிரியில் நடந்திருப்பது கொலையல்ல மிருகங்கள் நடத்திய வேட்டை, கொலை செய்யப்பட்டவர்கள் யாரோ அல்ல. நம்முடைய தாய், தந்தை போன்றவர்கள். பாக்கியம்மாள் காதில் இருந்த கம்மலை அறுத்து எடுத்துள்ளார்கள். வளையல்களை பறிக்க கையை வெட்டியுள்ளனர். இதுபோன்ற கோர சம்பவங்கள் கொங்கு மண்டலத்தில் தொடர்ந்து நடைபெறுகிறது.

நாமக்கல் மாவட்டம் பரமத்தி வேலூர், குப்பிச்சிபாளையம், ஈரோடு மாவட்டம் சென்னிமலை, திருப்பூர் மாவட்டம் பல்லடம் என்று தொடர்கிறது. இதில் ஈடுபட்ட கொலையாளிகள் இதுவரை கைது செய்யப்படவில்லை. பல்லடத்தில் மது அருந்தியதை தட்டிக்கேட்ட ஒரே குடும்பத்தை சேர்ந்த 4 பேர் கொலை செய்யப்பட்டனர். அதை கண்டித்து பா.ஜனதா அப்போதே போராட்டம் நடத்தியது. இதுவரை கொலையாளிகள் தண்டிக்கப்படவில்லை.

சிவகிரிக்கு இதுவரை பல நல்ல நிகழ்ச்சிகளுக்கு வந்துள்ளேன். இப்போது வந்துள்ளது மனதை வருத்தமடைய செய்துள்ளது. படுகொலை செய்யப்பட்ட வயதான தம்பதியின் பேரன், பேத்திகள் சம்பவம் நடப்பதற்கு முதல்நாளில் கூட வந்து தாத்தா, பாட்டியுடன் விடுமுறையை கழித்துள்ளனர். இப்போது அவர்களுக்கு யார் ஆறுதல் சொல்வது?.

வருகிற 19ம் தேதிக்குள் அதாவது இன்னும் 2 வாரங்கள் தமிழக காவல்துறைக்கு அவகாசம் அளிக்கிறேன். அதற்குள் ராமசாமி, பாக்கியம்மாள் தம்பதியை கொலை செய்தவர்களை கைது செய்யவேண்டும். இல்லை என்றால் 20ம் தேதி முதல் சிவகிரியில் எனது தலைமையில் பா.ஜனதா கட்சி சார்பில் தொடர் உண்ணாவிரத போராட்டம் நடத்துவேன்.

தமிழக காவல்துறையால் கொலையாளிகளை பிடிக்க முடியவில்லை என்றால் வழக்கை உடனே சி.பி.ஐ.க்கு மாற்ற உத்தரவிடவேண்டும். கடந்த 3 ஆண்டுகளுக்கு முன் ஒரு வழக்கை சி.பி.ஐ. நினைத்தால் எடுத்துக்கொள்ள முடியும் என்ற நிலை இருந்தது. தி.மு.க. அரசு செந்தில்பாலாஜிக்காக இதில் சட்டத்திருத்தம் கொண்டு வந்தது. தற்போது தமிழக அரசு, மத்திய அரசுக்கு கடிதம் கொடுத்தால்தான் வழக்கை சி.பி.ஐ. வசம் கொண்டு செல்ல முடியும்.

கொங்கு மண்டல மக்கள் தமிழக போலீசார் மீது இன்னும் நம்பிக்கை வைத்துள்ளனர். அதனால் விரைந்து கொலையாளிகளை பிடிப்பார்கள் என்று நம்புகிறேன். இல்லை என்றால் 20ம் தேதி நிச்சயம் அனைத்து தரப்பு மக்களையும் திரட்டி உண்ணாவிரதம் நடைபெறும்.

இவ்வாறு அவர் பேசினார்.

Read more

பவானியில் பெண் மரணத்தில் திடீர் திருப்பம்: முகத்தை தலையணையால் அழுத்தி கணவன் கொலை செய்தது அம்பலம்!

ஈரோடு மாவட்டம் பவானி கல்தொழிலாளர் 2-வது வீதியை சேர்ந்தவர் செல்வம் மகன் கார்த்தி (வயது 23). லாரி கிளீனர், இவர் திருச்சி மாவட்டம் லால்குடி பகுதியில் தங்கி இருந்து வேலை செய்து வந்தார். அப்போது அதே பகுதியை சேர்ந்த சூரிய பிரபா (38) என்ப வரை காதலித்தார்.

இதைத்தொடர்ந்து அவர்கள் 2 பேரும் கடந்த 3 மாதத்துக்கு முன்பு திருமணம் செய்து கொண்டனர். இதையடுத்து, இவர்கள் 2 பேரும் பவானி மேற்கு தெரு 2வது வீதியில் வசித்து வந்தனர். திருமணத் துக்கு பின்னர் கார்த்தி கட்டிட தொழிலாளியாக வேலைக்கு சென்று வந்தார்.

இந்த நிலையில், கடந்த 3ம் தேதி இரவு கணவன், மனைவிக்கு இடையே குடும்ப தகராறு ஏற்பட்டதாக கூறப்படுகிறது. அப்போது, சூரிய பிரபாவை கார்த்தி தாக்கியதாக தெரிகிறது. இதனிடையே, நேற்று முன்தினம் காலை எழுந்திருக்காததால் சூரியபிரபாவை தூக்கிக்கொண்டு பவானி அரசு மருத்துவமனைக்கு கார்த்தி சென்று உள்ளார்.

அங்கு பரிசோதனை செய்த டாக்டர்கள் ஏற்கனவே சூரிய பிரபா இறந்துவிட்ட தாக தெரிவித்தனர். மேலும் சூரிய பிரபாவின் உடலில் காயங்கள் இருந்ததால் இதுகுறித்து பவானி போலீசாருக்கு தகவல் தெரிவிக்கப்பட்டது.

அதன்பேரில் போலீசார் விரைந்து சென்று சூரிய பிரபாவின் உடலை கைப்பற்றி பிரேத பரிசோதனைக்காக பெருந்துறை அரசு மருத்துவ கல்லூரி மருத்துவமனைக்கு அனுப்பி வைத்தனர். இதையடுத்து மர்ம சாவு என வழக்குப்பதிவு செய்ததுடன், கார்த்தியிடம் போலீசார் விசாரணை நடத்தினர்.

போலீசாரின் விசாரணையில், கார்த்தி கொடுத்த பரபரப்பு வாக்குமூலம் வருமாறு, சூரிய பிரபா என்னை விட 15 வயது அதிகமானவர். ஏற்கனவே திருமணமாகி அவர் விவாகரத்து செய்த வர். ஆனால் இதை மறைத்து என்னை காதலித்து திருமணம் செய்து கொண்டார்.

மேலும் என் மீது சந்தேகப்பட்டு ஒவ்வொரு முறையும் என்னுடைய செல்போனை வாங்கி பார்ப்பார். அப்போது நான் பல பெண்களுடன் எடுத்த புகைப்படத்தை பார்த்து தினமும் சண்டை போட்டு வந்தார். இதனால் ஆத்திரத்தில் மனைவியை தாக்கியதுடன், அவருடைய முகத்தை தலையணையால் அழுத்தி கொலை செய்தேன். இவ்வாறு அவர் வாக்குமூலம் அளித்தார்.

இதைத்தொடர்ந்து இந்த வழக்கை கொலை வழக்காக போலீசார் மாற்றியதுடன் கார்த்தியையும் கைது செய்தனர்.

Read more

ஈரோடு மாவட்ட வளர்ச்சி திட்டப் பணிகள் தொடர்பாக அனைத்துத்துறை அலுவலர்களுடனான மாவட்ட உயர்மட்ட குழுக் கூட்டம்!

ஈரோடு மாவட்ட ஆட்சியர் அலுவலக கூட்டரங்கில், ஈரோடு மாவட்ட வளர்ச்சி திட்டப்பணிகள் தொடர்பாக அனைத்துத்துறை அலுவலர்களுடனான மாவட்ட உயர்மட்ட குழுக் கூட்டம் மாவட்ட ஆட்சியர் ராஜ கோபால் சுன்கரா தலைமையில் நடைபெற்றது.

இக்கூட்டத்தில், ஈரோடு மாவட்டத்தில் பொதுமக்கள் பயன்பெறும் வகையில் ஊரக வளர்ச்சி மற்றும் ஊராட்சித்துறையின் சார்பில் கத்திரிமலையில் மின் இணைப்பு வழங்குதல் மற்றும் சாலை தொடர்பு இல்லாத குக்கிராமங்களுக்கு சாலை வசதிகள் அமைப்பது தொடர்பாகவும், நகராட்சி நிர்வாகம் மற்றும் குடிநீர் வழங்கல் துறையின் சார்பில் ஈரோடு மாநகராட்சியில் பல்வேறு சாலைகளில் உள்ள ஆக்கிரமிப்புகளை அகற்றி கழிவுநீர் தேங்காமல் செல்ல நடவடிக்கை மேற்கொள்ளுதல் தொடர்பாகவும் ஆய்வு மேற்கொள்ளப்பட்டது.

தொடர்ந்து, மருத்துவம் மற்றும் மக்கள் நல்வாழ்வுத்துறையின் சார்பில் புதிதாக அனுமதிக்கப்பட்ட சுகாதார நிலையங்கள் அமைப்பதற்கான இடம் தேர்வு செய்வது மற்றும் பிறப்பு, இறப்பு பதிவில் பெற்றோரின் ஆதார் விபரங்கள் மென்பொருளில் பதிவு செய்து இணைப்பது தொடர்பாகவும், பேரூராட்சிகள் துறை, வனத்துறை, தமிழ்நாடு மின்சார வாரியத்தின் சார்பில் ஊராட்சிகளில் மின் கட்டண நிலுவையை குறைக்க நடவடிக்கை மேற்கொள்ளுதல் தொடர்பாகவும் ஆய்வு மேற்கொள்ளப்பட்டது.

மேலும், தொழிலாளர் நலத்துறையின் சார்பில் பதிவு பெற்ற தொழிலாளர்களுக்கு வீட்டுவசதி திட்டம் உள்ளிட்ட திட்டங்கள் தொடர்பாகவும், நெடுஞ்சாலைத்துறையின் சார்பில் ஈரோடு-கரூர் சாலை அகலப்படுத்துதல் மற்றும் வெள்ளகோயில்-சங்ககிரி சாலை அகலப்படுத்துதல் தொடர்பாகவும் என பல்வேறு துறைகளின் சார்பில் மேற்கொள்ள வேண்டிய பணிகள் தொடர்பாக துறை வாரியாக விரிவாக ஆய்வு மேற்கொண்டு, பணிகளை விரைந்து முடித்திட அலுவலர்களுக்கு அறிவுறுத்தினார்.

இக்கூட்டத்தில், மாவட்ட வருவாய் அலுவலர் சாந்த குமார், கூடுதல் ஆட்சியர் (வளர்ச்சி) அர்பித் ஜெயின், கோபிசெட்டிபாளையம் சார் ஆட்சியர் சிவானந்தம், மாவட்ட ஆட்சியரின் நேர்முக உதவியாளர் (பொது) முஹம்மது குதுரத்துல்லா உட்பட அனைத்துத்துறை உயர் அலுவலர்கள் கலந்து கொண்டனர்.

Read more

ஈரோடு மாவட்டத்தில் நாளை (மே.6) மின்சாரம் நிறுத்தப்படும் இடங்கள் அறிவிப்பு!

ஈரோடு மாவட்டத்தில் நாளை (மே.6) செவ்வாய்க்கிழமை மின்சாரம் நிறுத்தப்படும் இடங்களின் விவரம் குறித்து மின்வாரியம் சார்பில் அறிவிக்கப்பட்டுள்ளது.

ஈரோடு மாவட்டம் பெருந்துறை அருகே உள்ள விஜயமங்கலம் துணை மின் நிலையத்தில் நாளை (மே.6) செவ்வாய்க்கிழமை மாதாந்திர பராமரிப்பு பணிகள் நடக்கிறது. இதன் காரணமாக, நாளை காலை 9 மணி முதல் மதியம் 2 மணி வரை பெரியவீரசங்கிலி, சின்னவீரசங்கிலி, கைக்கோல பாளையம், வடமலை கவுண்டன்பாளையம், பச்சாகவுண்டன்பாளையம், கினிப்பாளையம், கிரேநகர், கரட்டூர் மற்றும் பாப்பம்பாளையம் ஆகிய பகுதிகளில் மின்சாரம் நிறுத்தப்படுவதாக தெரிவிக்கப்பட்டுள்ளது

Read more

முதிய தம்பதி படுகொலையை கண்டித்து ஈரோடு மாநகர் மாவட்ட அதிமுக சார்பில் கண்டன ஆர்ப்பாட்டம்!

ஈரோடு மாவட்டம் சிவகிரி அடுத்த விளாங்காட்டுவலசு பகுதியில் முதிய விவசாய தம்பதி ராமசாமி, பாக்கியம் ஆகியோர் அடித்து கொலை செய்யப்பட்ட சம்பவத்தை கண்டித்தும், சட்டம் ஒழுங்கு சீர்கேட்டுக்கு காரணமான திமுக அரசை கண்டித்தும், விளக்கேத்தி நான்கு சாலை சந்திப்பில் இன்று (மே.5) ஈரோடு மாநகர் மாவட்ட அதிமுக சார்பில் கண்டன ஆர்ப்பாட்டம் நடைபெற்றது.

ஆர்ப்பாட்டத்திற்கு முன்னாள் அமைச்சரும், மாநகர் மாவட்ட செயலாளருமான கே.வி.ராமலிங்கம் தலைமை தாங்கினார். முன்னாள் சட்டமன்ற உறுப்பினர்கள், கே.எஸ்.தென்னரசு, பாலகிருஷ்ணன், முன்னாள் நாடாளுமன்ற உறுப்பினர் செல்வகுமார சின்னையன், முன்னாள் மேயர் மல்லிகா பரமசிவம், அம்மா பேரவை மாநில துணை செயலாளர் வீரக்குமார் ஒன்றிய செயலாளர்கள் மயில் சுப்பிரமணி, செல்வராஜ், கதிர்வேல், கலைமணி உள்பட ஏராளமானோர் கலந்து கொண்டு கொலையாளிகளை விரைந்து கண்டுபிடிக்க வலியுறுத்தியும், தி.மு.க அரசுக்கு எதிராக கோஷங்களையும் எழுப்பினர்.

Read more

ஈரோடு ஆட்சியா் அலுவலக வளாகத்தில் ஆதார் கார்டுகளை தரையில் போட்டு இறப்பு சான்றிதழ் கேட்ட மக்கள்!

அடிப்படை வசதிகளை நிறைவேற்ற வலியுறுத்தி, ஈரோடு மாவட்ட ஆட்சியர் அலுவலக வளாகத்தில் ஆதார் கார்டுகளை தரையில் போட்டு இறப்பு சான்றிதழ் கேட்ட மக்களால் பரபரப்பு ஏற்பட்டது.

ஈரோடு மாவட்ட ஆட்சியர் அலுவலகத்தில் இன்று (மே.5) மக்கள் குறைதீர்க்கும் நாள் கூட்டம் ஆட்சியர் ராஜ கோபால் சுன்கரா தலைமையில் நடைபெற்றது. இதற்காக மாவட்டத்தின் பல்வேறு பகுதியில் இருந்து வந்திருந்த மக்கள் கலெக்டரை சந்தித்து தங்களது பிரச்சினைகள் குறித்து மனுக்களை வழங்கினர்.

அப்போது, ஆர்.என்.புதூர், காசிபாளையம் கிராமம் அன்னை தெரேசா நகரை சேர்ந்த மக்கள் சிலர் கையில் ஆதார் அட்டையுடன் வந்திருந்தனர். பின்னர் அவர்கள் திடீரென ஆதார் அட்டையை தரையில் போட்டு தரையில் அமர்ந்து தர்ணா போராட்டத்தில் ஈடுபட்டனர்.

இதனால் அங்கு பரபரப்பான சூழ்நிலை நிலவியது. இதுகுறித்து போராட்டத்தில் ஈடுபட்டவர்கள் கூறும்போது, நாங்கள் மேற்கொண்ட முகவரியில் கடந்த 18 வருடங்களாக எவ்வித அடிப்படை வசதி இன்றி வசித்து வருகிறோம். இங்கு சுமார் 60 குடும்பங்கள் குழந்தைகள் மற்றும் வயதானவர்களுடன் வசித்து வருகிறோம்.

எங்களுடைய அடிப்படை வசதிகள் குறித்து பலமுறை உயர் அதிகாரிகளை சந்தித்து மனு அளித்தும் இதுவரை எந்த ஒரு நடவடிக்கையும் எடுக்கவில்லை. இரவு நேரங்களில் இங்கு வாழும் வயதானவர்கள், குழந்தைகள் பாம்பு மற்றும் பூச்சிகளுக்கும் பயந்து வாழ்ந்து வருகின்றனர்.

ஆதார் கார்டு, ரேஷன் அட்டை போட்டு உரிமம் என எதுவும் எங்களுக்கு தேவையில்லை. எங்களால் முடிந்தவரை முயற்சி செய்தும் எந்த பலனும் இல்லாத காரணத்தால் இந்த முடிவுக்கு வந்துள்ளோம். எங்களுடைய ஆதாரங்கள் அனைத்தையும் அரசாங்கத்திடம் ஒப்படைக்கிறோம்.

இங்கு வாழும் 60 குடும்பத்தினரும் இறந்துவிட்டதாக கருதி இறப்பு சான்றிதழ் அளித்து விடுங்கள், இல்லை என்றால் இங்கு வாழும் 60 குடும்பங்களுக்கும் இலவச பட்டா மற்றும் அடிப்படை வசதி செய்து தருமாறு கேட்டுக்கொள்கிறோம் என்றனர். இதை அடுத்து அதிகாரிகள், உயர் அதிகாரிகளிடம் பேசி உரிய வசதிகள் செய்து கொடுக்கப்படும் என்று கூறினர்.

Read more

சேலத்தில் அன்னை தெரசா மனிதநேய அறக்கட்டளை நிர்வாகி விஜய பானு என்பவரின் வளர்ச்சியை சீர்குலைக்க செந்தில்குமார் பல கோடி ரூபாய் அபகரித்து, நிகழ்த்திய சதி வலையே கைது நடவடிக்கைக்கு காரணம். விஜயபானுவின் அறக்கட்டளை வழக்கறிஞர்கள் பகிரங்க குற்றச்சாட்டு........

சேலம். 

S.K. சுரேஷ்பாபு. 

சேலத்தில் அன்னை தெரசா மனிதநேய அறக்கட்டளை நிர்வாகி விஜய பானு என்பவரின் வளர்ச்சியை சீர்குலைக்க செந்தில்குமார் பல கோடி ரூபாய் அபகரித்து, நிகழ்த்திய சதி வலையே கைது நடவடிக்கைக்கு காரணம். விஜயபானுவின் அறக்கட்டளை வழக்கறிஞர்கள் பகிரங்க குற்றச்சாட்டு........

சேலத்தில் பண ரெட்டிப்பு மோசடி வழக்கில் தலைமையகமாக இருந்த தம்பதியினர் கைது. 

சேலம் அம்மாபேட்டையில் புனித அன்னை தெரசா மனிதநேய அறக்கட்டளையை விஜய பானு என்பவர் நடத்தி வந்தார். இவர் பணம் இரட்டிப்பு செய்து தருவதாக கூறி அந்த பகுதியினர் இடையே கோடிக்கணக்கில் பணம் வசூல் செய்து மோசடியில் ஈடுபட்டதாக கூறப்படுகிறது. இதுகுறித்து சேலம் பொருளாதார குற்றப்பிரிவு காவல் துறையினர் வழக்கு பதிவு செய்து விஜய பானு மற்றும் அறக்கட்டளை  ஜெயப்பிரதா, பாஸ்கர், சையதுமுகமது ஆகிய நான்கு பேரையும் கைது செய்து சிறையில் அடைத்தனர். தற்போது அவர்கள் ஜாமீனில் வெளியே வந்து சேலம் பொருளாதார குற்றப்பிரிவு காவல் நிலையத்தில் நாள்தோறும் கையெழுத்து இட்டு வருகின்றனர். இதனிடையே இந்த வழக்கில் தொடர்புடைய செந்தில்குமார் அவருடைய மனைவி கரோலின் ஜான்சி ராணி ஆகியோர் தலைமறைவாக இருந்து வந்தனர். இவர்கள் அன்னை தெரசா மனிதநேய அறக்கட்டளையின் முக்கிய நிர்வாகிகளாக இருந்து வந்துள்ளனர். இதன் காரணமாக அவர்களைப் பிடிக்க காவல்துறையினர் தீவிர நடவடிக்கை மேற்கொண்டனர். சம்பந்தப்பட்ட இருவரும் சென்னை உயர்நீதிமன்றத்தில் தாக்கல் செய்த முன்ஜாமின் மனுவும் தள்ளுபடி செய்யப்பட்டது. இந்த நிலையில் தலைமறைவாக இருந்த செந்தில்குமார் அவருடைய மனைவி கரோலின் ஜான்சி ராணி ஆகியோரை கடந்த சில தினங்களுக்கு முன்பு சேலத்தில் பொருளாதார குற்றப்பிரிவு காவல் துறையினர் கைது செய்தனர். பின்னர் அவர்கள் இருவரையும் கோவையில் உள்ள டான் பிட் நீதிமன்றத்தில் ஆஜர் படுத்தி  பின்னர் சிறையில் அடைக்க நடவடிக்கை எடுத்து வருவதாக காவல்துறை தரப்பில் தெரிவிக்கப்பட்டது. இந்த பண ரெட்டிப்பு மோசடி வழக்கு குறித்து உண்மை நிலையை கண்டறிய இந்த வழக்கில் முக்கிய குற்றவாளியாக கைது செய்யப்பட்டுள்ள விஜய பானு அவர்களின் அறக்கட்டளையின்  சென்னை உயர்நீதிமன்ற வழக்கறிஞர்களை நமது செய்தி குழு அனுகியது.  அப்பொழுது அவர் கூறிய தகவல்கள் அனைத்தும் திடுக்கிட வைப்பதாகவே இருந்தது. அப்போது வழக்கறிஞர்கள் கூறுகையில், செந்தில்குமார் என்பவர் வலியுறுத்தியதன் அடிப்படையில், கடந்த 2023 ஆம் ஆண்டு ஜனவரி 15ஆம் தேதி அன்னை தெரசா மனிதநேய அறக்கட்டளை என்ற பெயரில் தொடங்கிய இந்த அமைப்பு, பணம் இரட்டிப்பு செய்து தருவதற்காக தொடங்கப்பட்டதாகவும், இதனை அறிந்த அம்மாபேட்டை மற்றும் அதன் சுற்றுவட்டார பகுதிகளை சேர்ந்த ஏராளமானோர் ஆர்வத்துடன் பணத்தை செலுத்தி இதில் பலனும் அடைந்ததாகவும், இந்த அறக்கட்டளையில் தன்னை இணைத்து கொண்டதாகவும் தெரிவித்தனர். தொடர்ந்து பணம் முதலீடு செய்பவர்களின் எண்ணிக்கை நாளுக்கு நாள் அதிகரிக்கவே, நேர்மையான முறையில் விஜய பானு பணம் முதலீடு செய்தவர்களுக்கு பணம் இரட்டிப்பு செய்து கொடுத்து வந்ததன் அடிப்படையில் விஜய பானுவின் மதிப்பு உயர்ந்ததாகவும் தெரிவித்தஅவர்கள், செந்தில்குமார் என்பவர் தனக்கு கீழ் சுமார் ஒரு இருபதுக்கும் மேற்பட்ட பாதிரியார்களை வைத்துக்கொண்டு பணம் முதலீடு செய்பவர்களிடம் ஒரு தொகையை கமிஷன் அடித்துக் கொண்டு பின்னர் விஜய பானு நடத்தி வரும் அறக்கட்டளையில் பணம் முதலீடு செய்ததாகவும், ஏராளமானவரிடம் பணத்தைப் பெற்றுக் கொண்டு முதலீடு செய்வதையும் தவிர்த்து உள்ளார். ஒருபுறம் விஜய பானுவின் புகழ் அதிகரித்துக் கொண்டே சென்ற நிலையில், அம்மாபேட்டை பகுதியில் இமானுவேல் பேராலயம் அமைப்பதற்காக ஒன்றரை கோடி ரூபாய் நன்கொடை விஜய பானுவிடம் செந்தில்குமார் கேட்டு பெற்றதாகவும், பேராலயம் அமைப்பதற்கான பணியையும் தொடங்கவில்லை. பேராலயம் அமைப்பதற்கான நன்கொடையை பெற்றுக் கொண்டு இந்த நிறுவனத்திலேயே செந்தில்குமார் முதலீடு செய்ததாகவும் வழக்கறிஞர்கள் தரப்பில் இதனை அறிந்த விஜய பானு அவர்கள், சம்பந்தப்பட்ட செந்தில் குமாரிடம் கேட்டபோது சூழ்ச்சி செய்து வேண்டுமென்றே சிறப்பு பல நாடகங்கள் ஆடி காவல் துறையில் சிக்க வைத்ததாக கூறிய வழக்கறிஞர்கள், இதனை பொறுத்துக் கொள்ளாத செந்தில்குமார் கால் புணர்ச்சி காரணமாக இவரது பெயர் புகழ் அந்தஸ்து ஆகியவற்றை பழி தீர்க்கும் வகையில், சில காவல்துறை அதிகாரிகளை கையில் வைத்துக் கொண்டு தீட்டிய திட்டமே இந்த வழக்கின் உச்சக்கட்டம் என்றனர்.

தொடர்ந்து பேசிய அவர், விஜய பானு மற்றும் அவரது நிர்வாகிகள் கைது செய்யப்பட்டு சிறையில் அடைக்கப்பட்ட பிறகு, செந்தில்குமார் என்பவரும் அவரது மனைவியும் தலைமறைவாக இருந்தனர் என்றும் தலைமறைவாக இருந்த செந்தில்குமார் மற்றும் அவரது மனைவியை கைது செய்ய அப்போது புதிதாக பொறுப்பேற்று இருந்த சேலம் பொருளாதார குற்றப்பிரிவு துணை கண்காணிப்பாளர் சந்திரசேகர் என்பவர் தனிப்படைகளை அமைத்து தீவிரமாக தேடி வந்ததாகவும், அது மட்டுமல்லாமல் இந்த வழக்கு தொடர்பாக செந்தில்குமாரின் வங்கி கணக்குகள் அனைத்தும் முடக்கப்பட்டு இருந்த நிலையில்,  முடக்கம் செய்யப்பட்டிருந்தவங்கி கணக்குகளை நீக்கம் செய்வதற்காக தனது வழக்கறிஞர் ஒருவருடன் செந்தில்குமார் காவல் நிலையத்திற்கு வந்தபோது, டி எஸ் பி சந்திரசேகர் உத்தரவின் பெயரில் அதிரடியாக செந்தில்குமார் கைது செய்யப்பட்டார் என்றும் கூறிய வழக்கறிஞர்கள், அன்னை தெரசா மனிதநேய அறக்கட்டளையில் பண இரட்டிப்பு செய்து தருவதாக ஏற்பட்ட மோசடியில் 217 புகார்கள் பதிவு செய்யப்பட்டு உள்ளதாகவும் இந்த வழக்கில் தொடர்புடையவர்களுக்கு சுமார் 7 கோடி ரூபாய் கணக்கிடப்பட்டுள்ளதாகவும் அந்தத் தொகையையும் விஜய பானு அவர்கள் திருப்பி தர தயாராக இருப்பதாகவும், இதுபோக புகார் அளிக்காத அவர்களுக்கும் அவர்கள் முதலீடு செய்த தொகையை திரும்ப வழங்குவதற்கும் விஜய பானு அவர்கள் தயாராக இருப்பதாகவும் வழக்கறிஞர்கள் தரப்பில் தெரிவிக்கப்பட்டுள்ளது. இந்தப் பணம் இரட்டிப்பு மோசடி தொடர்பாக சேலம் பொருளாதார குற்றப்பிரிவு துணை கண்காணிப்பாளர் சந்திரசேகர் அவர்கள் விசாரணை மிக நேர்த்தியாகவும் நேர்மையாகவும் இருப்பதாக பாராட்டிய அவர்கள், இந்த வழக்கு முடிந்த பிறகு இந்த வழக்கு தொடர்பாக புகார்  அளித்தவர்களுக்கு பணம் திரும்ப வழங்க விஜய பானு அவர்கள் தயாராக  உள்ளதாகவும் தெரிவித்த அவர்கள், இந்த பண மோசடி வழக்கில் பல கோடி ரூபாயை அறக்கட்டளை நிர்வாகியான விஜய பானுவுக்கு தெரியாமல் அபகரித்தது செந்தில்குமார் மற்றும் அவரது மனைவி என்றும் பகிரங்கமாக குற்றம் சாட்டினார். இந்த பிரச்சனை விஸ்வரூபம் எடுத்த பிறகு கிராமப்புறத்தில் உள்ள படிக்காதவர்கள் கூட தாங்கள் முதலீடு செய்த பணம் தங்களுக்கு கிடைத்தால் போதும் என்பதை அவர்களது குறிப்பேட்டில் பதிவிட்டது ஒரு புறம் இருக்க, ஆனால் படித்தவர்கள் பண ஆசைக்காக 15 லட்சம் முதல் 25 லட்சம் வரை முதலீடு செய்ததாகவும் அது தற்போது வரை தங்களுக்கு திரும்ப கிடைக்கவில்லை என்றும் காவல் நிலையத்தில் புகார் அளித்துள்ளது வேடிக்கையாக இருக்கிறது என்பதும் அறக்கட்டளை வழக்கறிஞர்களின் குற்றச்சாட்டாகவே உள்ளது. இந்த வழக்கு தொடர்பாக விஜய் பானு மற்றும் நிர்வாகிகள் கைது செய்யப்பட்டு சிறையில் அடைத்த பிறகு செந்தில்குமார் என்பவர் ஜீவன் அறக்கட்டளை என்ற பெயரில் ஏழையை இளையவர்களும் பணம் பெற்று வசூல் செய்ததும் தெரியவந்தது என்பது வழக்கறிஞர்களின் தகவலாகவே உள்ளது. மேலும் இந்த அறக்கட்டளையின் பெயரை பயன்படுத்தி பொதுமக்களிடம் வசூலித்து பல கோடி ரூபாயை அபகரித்த செந்தில்குமார் இடம் இருந்து அந்த தொகையை மீட்டு பாதிக்கப்பட்டவர்களுக்கு வழங்க வேண்டும் என்பதும் வழக்கறிஞர்களின் கோரிக்கையாக உள்ளது. இந்தப் வழக்கு தொடர்பாக தொடர்ச்சியாக விசாரணை நடைபெற்று வருவதாகவும் இனிவரும் காலங்களில் கூடுதல் தகவல் வெளியாகும் என்றே எதிர்பார்க்கலாம்.

இறுதியாக செந்தில்குமரிடம் பணம் முதலீடு செய்தவர்களுக்கு எக்காரணத்தை கொண்டும் அன்னை தெரசா மனிதநேய அறக்கட்டளை பொறுப்பேற்காது என்பது குறிப்பிடத்தக்கது.

  

Read more