ஈரோடு மக்கள் குறைதீர் நாள் கூட்டத்தில் 372 மனுக்கள் அளிப்பு

ஈரோடு மாவட்ட ஆட்சியர் அலுவலகத்தில் இன்று (8ம் தேதி) நடந்த மக்கள் குறைதீர் கூட்டத்தில் பொதுமக்களிடம் இருந்து 372 மனுக்கள் பெறப்பட்டன.

ஈரோடு மாவட்ட ஆட்சியர் அலுவலக கூட்டரங்கில் மாவட்ட ஆட்சியர் ராஜ கோபால் சுன்கரா தலைமையில் மக்கள் குறைதீர்க்கும் நாள் கூட்டம் நடைபெற்றது. இக்குறைதீர்க்கும் நாள் கூட்டத்தில் கலைஞர் மகளிர் உரிமைத் திட்டம், குடிநீர் இணைப்பு, ஓய்வூதியம், இலவச வீட்டுமனைப்பட்டா, வேலைவாய்ப்பு மற்றும் காவல் துறை நடவடிக்கை உள்ளிட்ட பல்வேறு கோரிக்கைகள் குறித்து மொத்தம் 372 மனுக்கள் பெறப்பட்டன.

பொதுமக்கள் அளித்த பல்வேறு கோரிக்கை மனுக்களை மாவட்ட ஆட்சியர் பெற்று உரிய துறை அலுவலர்களிடம் வழங்கி அவற்றின் மீது உடனடி நடவடிக்கை எடுத்திட உத்தரவிட்டார். மேலும், முதலமைச்சர் தனிப்பிரிவு மனுக்கள், மக்கள் குறைதீர்க்கும் நாள் கூட்டத்தில் பெறப்பட்ட மனுக்கள் மீது மேற்கொள்ளப்பட்ட நடவடிக்கைகள் குறித்து ஆய்வு மேற்கொண்டார்.

தொடர்ந்து, மாற்றுத்திறனாளிகள் நலத்துறையின் சார்பில் 6 நபர்களுக்கு மூளை முடக்குவாதத்தால் பாதிக்கப்பட்டவர்கள், மனவளர்ச்சி குன்றியவர்கள், ஆட்டிசம் குறைபாடுடையவர்கள், பல்வகை ஊனத்தால் பாதிக்கப்பட்டவர்களுக்கான சட்டப்பூர்வ பாதுகாவலர் நியமனச்சான்றிதழ்கள் மற்றும் ஒரு மாற்றுத்திறனாளிக்கு திருமண நிதியுதவியாக 8 கிராம் தங்கம் வழங்கினார்.

இக்கூட்டத்தில், மாவட்ட வருவாய் அலுவலர் சாந்த குமார், உதவி ஆட்சியர் (பயிற்சி) ராமகிருஷ்ணசாமி, உதவி ஆணையர் (கலால்) ஜீவரேகா, தனித்துணை ஆட்சியர் (ச.பா.தி) செல்வராஜ், மாவட்ட வழங்கல் அலுவலர் ராம்குமார், மாற்றுத்திறனாளிகள் நல அலுவலர் உட்பட அனைத்துத்துறை அலுவலர்கள் கலந்து கொண்டனர்.

শেয়ার করুন