ஆருயிர் அனைவரும் உயிர் காப்போம் திட்டத்தை துவக்கி வைத்த முதல்வர்

சென்னை தலைமைச் செயலகத்தில், இந்திய மருத்துவ சங்கம் தமிழ்நாடு கிளையின் சார்பில் தமிழ்நாட்டில் உள்ள அனைத்து மக்களுக்கும் அடிப்படை உயிர்காக்கும் பயிற்சி கொடுப்பதற்காக ஆருயிர் அனைவரும் உயிர் காப்போம் என்ற திட்டத்தை முதல்வர் ஸ்டாலின் தொடங்கி வைத்தார்.

சாலை விபத்துகள், தொழில்சார் ஆபத்துகள், இதய அவசரநிலைகள், பக்கவாதம் போன்றவை உலகளவில் அதிக உயிரிழப்புகளை ஏற்படுத்துகின்றன. இதுபோன்ற நேரங்களில், ஒவ்வொரு நொடியும் நோயாளியின் உயிரைக் காப்பாற்றும் பொன்னான நேரமாகும். நோயாளி மருத்துவமனைக்குச் செல்வதற்கு முன்பே, தனிநபர்கள் தேவையான உயிர்காக்கும் நடவடிக்கைகளை மேற்கொள்ள, மக்களிடையே அடிப்படை உயிர்காக்கும் பயிற்சி பற்றிய போதுமான அறிவு மற்றும் விழிப்புணர்வு ஏற்படுத்துவது இன்றியமையாதது ஆகும். இதுபோன்ற நெருக்கடியான நேரங்களில், தாமதமின்றி இதய துடிப்பு மற்றும் சுவாசத்தை சரிபார்க்கவும். மார்பு அழுத்தம் மற்றும் வாயிலிருந்து வாய் சுவாசம் தொடங்கவும் ஆருயிர் அனைவரும் உயிர் காப்போம் திட்டத்தின் கீழ் பயிற்சி அளிக்கப்படும்.

இந்திய மருத்துவ சங்கம் தமிழ்நாடு கிளையின் 170 கிளைகளிலும் உள்ள சுமார் 42,000 மருத்துவர்கள் இந்த பயிற்சி பணியில் ஈடுபடுவார்கள். இதன்மூலம் தமிழ்நாட்டின் உள்ள அனைவருக்கும் இப்பயிற்சியை அளித்து நமது மாநிலத்தை 100 சதவிகிதம் அடிப்படை உயிர் காக்கும் பயிற்சி தெரிந்த மக்கள் கொண்ட மாநிலமாக ஒரு வருட காலத்திற்குள் மாற்றிட திட்டமிடப்பட்டுள்ளது.

இந்த நிகழ்ச்சியில், நாடாளுமன்ற உறுப்பினர் டாக்டர் கனிமொழி சோமு, சட்டமன்ற உறுப்பினர் மருத்துவர் நா.எழிலன், இந்திய மருத்துவக் கழகத்தின் மாநிலத் தலைவர் டாக்டர் கே.எம்.அபுல்ஹாசன், செயலாளர்

டாக்டர் எஸ். கார்த்திக் பிரபு, பெண் மருத்துவர் பிரிவு செயலாளர் டாக்டர் கிருத்திகா தேவி. முன்னாள் தலைவர் டாக்டர் டி.என். ரவிசங்கர், மாநில நிதிச் செயலாளர் டாக்டர் கௌரி சங்கர் ஆகியோர் கலந்து கொண்டனர்.

Read more

ஈரோட்டில் ஜவுளி வியாபாரி வீட்டின் கதவை உடைத்து 3.5 பவுன் நகை, ரூ.2 லட்சம் கொள்ளை

ஈரோட்டில் ஜவுளி வியாபாரி வீட்டின் கதவை உடைத்து உள்ளே புகுந்து பீரோவில் இருந்த 3.5 பவுன் நகைகள் மற்றும் ரூ.2 லட்சத்தை கொள்ளையடித்துச்சென்ற மர்ம நபர்களை போலீசார் தேடி வருகின்றனர்.

ஈரோடு நாடார் மேடு அண்ணாதுரை வீதியில் பர்கத் பாவா (வயது 28) என்பவர் வாடகை வீட்டில் மனைவி மகனுடன் வசித்து வருகிறார். ஜவுளி வியாபாரியான பர்கத் பாவா கடந்த 2ம் தேதி வீட்டை பூட்டி விட்டு வெளியூர் சென்றார். 

இந்நிலையில், 6ம் தேதி (நேற்று) இரவு வீட்டுக்கு வந்தபோது வீட்டின் பின்புற கதவு பூட்டு உடைக்கப்பட்டு வீடு திறந்து கிடந்தது. இதைப்பார்த்து அதிர்ச்சியடைந்த அவரது குடும்பத்தினர் வீட்டின் உள்ளே சென்று பார்த்த போது, பீரோ உடைக்கப்பட்டு அதிலிருந்த ரூ.2 லட்சம் ரொக்கம் மற்றும் 3.5 பவுன் நகை கொள்ளையடிக்கப்பட்டு இருப்பது தெரியவந்தது.

இதுகுறித்து பர்கத் பாவாவின் குடும்பத்தினர் ஈரோடு தெற்கு காவல்துறையினரிடம் புகார் அளித்தனர். இதனைத் தொடர்ந்து சம்பவ இடத்திற்கு வந்த ஈரோடு தெற்கு காவல் துறையினர் அப்பகுதியில் உள்ள சிசிடிவி கண்காணிப்பு கேமராக்களை சோதனை செய்து வருகின்றனர். மேலும், இக்கொள்ளையில் ஈடுபட்ட மர்ம நபர்களை தேடும் பணியில் ஈடுபட்டுள்ளனர்.

Read more

ஈரோடு மாவட்டத்தில் நாளை (8ம் தேதி) மின்தடை ஏற்படும் இடங்கள் அறிவிப்பு

ஈரோடு மாவட்டத்தில் நாளை (8ம் தேதி) திங்கட்கிழமை மின்தடை ஏற்படும் இடங்கள் குறித்து மின்வாரியம் அறிவித்துள்ளது.

ஈரோடு மாவட்டத்தில் நாளை (8ம் தேதி) திங்கட்கிழமை மின்தடை ஏற்படும் பகுதிகள் குறித்து மின்வாரியம் சார்பில் அறிவிக்கப்பட்டுள்ளது. ஆகையால், நாளை காலை 9 மணி முதல் மதியம் 2 மணி வரை கீழ்க்கண்ட இந்தப் பகுதிகளில் மின்விநியோகம் இருக்காது என தெரிவிக்கப்பட்டுள்ளது.

கோபி துணை மின் நிலையம்:- 

மின்விநியோகம் தடை செய்யப்படும் பகுதிகள்:- கோபி பேருந்து நிலைய பகுதி, பாரியூர், மொடச்சூர், பா.வெள்ளாளபாளையம், நஞ்சகவுண்டன்பாளையம், குள்ளம்பாளையம், நாதிபாளையம், வடுகபாளையம், வேட்டைக்காரன்கோவில், நாகதேவன்பாளையம், குறவம்பாளையம், பழையூர், நஞ்சை கோபி மற்றும் உடையாம்பாளையம்.

அம்மாபேட்டை அருகே உள்ள சென்னம்பட்டி துணை மின் நிலையம்:- 

மின்விநியோகம் தடை செய்யப்படும் பகுதிகள்:- கண்ணாமூச்சி, கொமராயனூர், தொட்டிக்கிணறு, கிட்டம்பட்டி, முரளிபுதூர், வெள்ளக்கரட்டூர். சனிசந்தை, விராலிகாட்டூர், குருவரெட்டியூர், ஆலமரத்தோட்டம், பொரவிபாளையம், குரும்பபாளையம், தண்ணீர்பந்தல் பாளையம் மற்றும் ஜி.ஜி.நகர் ஆகிய பகுதிகளில் மின்சாரம் இருக்காது என தெரிவிக்கப்பட்டுள்ளது.

Read more

பெருந்துறையில் பானிபூரி, பேக்கரி மற்றும் சாலையோர தள்ளுவண்டி கடைகளில் உணவு பாதுகாப்புத் துறையினர் ஆய்வு

பெருந்துறையில் பானிபூரி, பேக்கரி மற்றும் சாலையோர தள்ளுவண்டி கடைகளில் உணவு பாதுகாப்புத் துறையினர் ஆய்வு

ஈரோடு மாவட்ட ஆட்சித்தலைவர் அவர்களின் உத்தரவின் பேரிலும்,மாவட்ட நியமன அலுவலரின் அறிவுரையின் பேரிலும் பவானி ரோட்டில் உள்ள சன் பேக்கரி, குன்னத்தூர் ரோட்டில் உள்ள வந்தனம் பேக்கரி , பைபாஸ் ரோட்டில் உள்ள விநாயகா பேக்கரி மற்றும் அப்பகுதிகளில் உள்ள பானிபூரி கடைகள் மற்றும் சாலையோர தள்ளுவண்டி கடைகளில் பெருந்துறை உணவு பாதுகாப்பு அலுவலர் முத்துகிருஷ்ணன் ஆய்வு செய்தார். 

ஆய்வின்போது பொது மக்களுக்கு விற்பனை செய்யப்படும் பிரட் ,பன் மற்றும் ஸ்நாக்ஸ் வகைகள் தயாரிப்பு தேதி காலாவதி தேதி குறிப்பிடப்படாமல் விற்பனை செய்வது கண்டறியப்பட்டு ரூபாய் 1,000 மதிப்புள்ள 20 பிரட் பாக்கெட்டுகள் மற்றும் ரூபாய் 1,500 மதிப்புள்ள ஸ்நாக்ஸ் பாக்கெட்டுகள் பறிமுதல் செய்யப்பட்டு எச்சரிக்கை நோட்டீஸ் வழங்கி அழிக்கப்பட்டதுடன் பவானி ரோடு மற்றும் பைபாஸ் ரோட்டில் உள்ள பேக்கரிகளுக்கு தலா 1000 ரூபாய் அபராதம் விதிக்கப்பட்டது. 

குன்னத்தூர் ரோட்டில் உள்ள பேக்கரியில் ஃப்ரீசரில் சுகாதாரமற்ற முறையில் வைக்கப்பட்டிருந்த ஐஸ்கிரீம்,பழங்கள், மசால் தடவிய கோழி இறைச்சி ,சாண்ட்விச் ,பர்கருக்கு பயன்படுத்த வைக்கப்பட்டிருந்த சட்னி ,தக்காளி சாஸ், பொதுமக்களுக்கு விற்பனைக்காக வைத்திருந்த காலாவதியான பிரட் மற்றும் கோகோ மிட்டாய் பாக்கெட்டுகள் பறிமுதல் செய்து எச்சரிக்கை நோட்டீஸ் வழங்கி அழிக்கப்பட்டதுடன் ரூபாய் 3,000 அபராதம் விதிக்கப்பட்டது. 

மேலும் பேக் செய்யப்பட்ட பிரட், பன் மற்றும் ஸ்நாக்ஸ் வகைகளில் தயாரிப்பு தேதி ,காலாவதி தேதி உள்ளிட்ட அனைத்து லேபிள் விவரங்களும் குறிப்பிடப்பட்டு விற்பனை செய்ய வேண்டும் என பேக்கரி உரிமையாளர்களுக்கு எச்சரிக்கை செய்யப்பட்டது.

பானி பூரி கடைகளில் பானிபூரி ரசத்தில் உடல் நலத்திற்கு தீங்கு விளைவிக்கும் செயற்கை நிறமிகள் சேர்க்கப்பட்டுள்ளதா என்று சோதனை செய்து சுகாதாரமான முறையில் தரமான மூலப்பொருட்களை கொண்டு செயற்கை நிறம் சேர்க்காமல் பானி பூரி மற்றும் ரசம் தயாரித்து விற்பனை செய்யப்பட வேண்டும் என வியாபாரிகளுக்கு எச்சரிக்கை செய்து பொதுமக்களுக்கு விற்பனைக்காக வைக்கப்பட்டிருந்த பானிபூரி ரசத்தில் உணவு மாதிரிகள் சேகரித்து உணவு பகுப்பாய்வுக்கு அனுப்பி வைக்கப்பட்டுள்ளது.மேலும் சாலையோர தள்ளுவண்டி கடைகளில் ஆய்வு செய்து சுகாதாரமான முறையில் செயற்கை நிறம் சேர்க்காமல் தினமும் புதிய உணவு எண்ணெய் வகைகள் பயன்படுத்தி வடை போண்டா மற்றும் பலகாரங்கள் தயாரித்து பொதுமக்களுக்கு விற்பனை செய்யப்பட வேண்டும் என எச்சரிக்கை செய்து உணவு பாதுகாப்பு பற்றிய விழிப்புணர்வு ஏற்படுத்தப்பட்டதுடன் சாலையோர தள்ளுவண்டி கடைகளின் மூலம் உணவுப் பொருள்கள் விற்பனை செய்பவர்கள் உணவு பாதுகாப்புச் சட்டத்தின் கீழ் கண்டிப்பாக உரிமம் பெற வேண்டும் எனவும் தெரிவிக்கப்பட்டது. 

பவானி ரோட்டில் இருந்த ஒரு தள்ளுவண்டி கடையில் ஏற்கனவே பயன்படுத்திய உணவு எண்ணெயை மீண்டும் பயன்படுத்த வைத்திருந்தது கண்டறியப்பட்டு அழிக்கப்பட்டதுடன் தினமும் புதிய உணவு எண்ணெய் வகைகளை பயன்படுத்த வேண்டும் என எச்சரிக்கை செய்யப்பட்டு எண்ணெயில் பொரித்த உணவுப் பொருட்களை செய்தித்தாள் மற்றும் தடை செய்யப்பட்ட பாலிதீன் கவரில் வைத்து வழங்காமல் சுத்தமான தட்டு மற்றும் வாழை இலையில் வைத்து விற்பனை செய்ய வேண்டும் என எச்சரிக்கப்பட்டது.

இது குறித்து மாவட்ட நியமன அலுவலர்டாக்டர் தங்கவிக்னேஷ் கூறுகையில், ஈரோடு மாவட்டம் முழுவதும் இது போன்ற ஆய்வுகள் தொடர்ந்து நடைபெறும் எனவும் தரம் குறைவான பானிபூரி மற்றும் இதர உணவுப் பொருட்கள் விற்பனை செய்வது குறித்து பொதுமக்கள் 9444042322 என்ற எண்ணை தொடர்பு தொடர்பு கொண்டு புகார் தெரிவிக்கலாம் என்றும் கூறினார்.

Read more

திருப்பூர் கேஎம்சி சட்டக் கல்லூரி சார்பில் ஜூலை.28ல் மாரத்தான்: முன்பதிவு துவக்கம்

திருப்பூர் மாவட்டம் பெருமாநல்லூர் கேஎம்சி சட்டக் கல்லூரி சார்பில் ஜூலை 28ம் தேதி மாரத்தான் போட்டி நடைபெறுவதையொட்டி முன்பதிவுகள் துவங்கப்பட்டுள்ளது.

கேஎம்சி சட்டக் கல்லூரி உலக இயற்கை பாதுகாப்பு தினத்தை முன்னிட்டு வருகின்ற ஜூலை மாதம் 28ஆம் தேதி திருப்பூரில் "இயற்கை பாதுகாப்பு மாரத்தான் ஓட்டம்" என்ற தலைப்பில் மாரத்தான் போட்டி நடத்துகின்றது.

இப்போட்டிக்கான பதிவு துவக்கம், திருப்பூர் காவல்துறை கண்காணிப்பாளர் அபிஷேக் குப்தா அவர்கள் போட்டியின் இணையதளத்தை கடந்த 3ம் தேதியன்று வெளியிட்டு துவக்கி வைத்தார். இவ்வெளியீட்டு நிகழ்வில், கேஎம்சி சட்டக் கல்லூரி தாளாளர் திருமதி ஜி அருணா ஸ்ரீதேவியிடம் திரு அபிஷேக் குப்தா அவர்கள் சிற்றேடு அளித்து வாழ்த்து தெரிவித்தார்.

 

இந்நிகழ்வில், கேஎம்சி சட்டக் கல்லூரி செயலாளர் செல்வி ஜி ஞான வர்ஷினி, திரு விஷ்ணு யசஸ்வந்த், கல்லூரி முதல்வர் முனைவர் திரு எம்.எஸ். சௌந்தரபாண்டியன் மற்றும் பலர் கலந்து கொண்டனர்.

15 முதல் 25 வயதுக்கு உட்பட்ட ஆண்கள் பெண்கள் இரண்டு பிரிவுகள் ஆகவும், 25 வயதுக்கும் மேட்பட்ட ஆண்கள் பெண்கள் இரண்டு பிரிவுகள் ஆகவும் மொத்தம் நான்கு பிரிவுகள் உள்ளன.

 வெற்றியாளர்களின் பரிசுத்தொகை ரூபாய் 72,000 மாரத்தான் ஓட்டம் பெருமாநல்லூர் கே எம் சி சட்டக் கல்லூரியில் தொடங்கி, 8.5 கி.மீ. வட்டமிட்டு அதே இடத்தில் முடிவடையும். மாரத்தான் போட்டிக்கான பதிவு www.conservenaturerun.com என்ற இணையதளத்தில் நடைபெறத் துவங்கி உள்ளது.

Read more

ஈரோட்டில் தேசிய தூய்மைப் பணியாளர் ஆணைய தலைவர் ஆய்வு

ஈரோடு மாவட்ட ஆட்சியர் அலுவலக கூட்டரங்கில் தேசிய தூய்மைப் பணியாளர் ஆணைய தலைவர் வெங்கடேசன் தலைமையில் தூய்மைப் பணியாளர் நலன் குறித்த ஆய்வுக் கூட்டம் நடைபெற்றது. இந்த கூட்டத்திற்கு, மாவட்ட ஆட்சியர் ராஜ கோபால் சுன்கரா முன்னிலை வகித்தார்.

இக்கூட்டத்தில் தேசிய தூய்மை பணியாளர் ஆணைய தலைவர் வெங்கடேசன் தெரிவித்ததாவது, தூய்மை பணியாளர்கள் நல ஆணையம் என்பது தூய்மை பணியாளர்களின் குறைகளை கண்டறிந்து நிறைவேற்றுவது மட்டுமல்லாது அவர்களது வாழ்வியலை உயர்த்துவதே இதன் முக்கியமான நோக்கமாகும். தூய்மை பணியாளர்களுக்கான அடிப்படை வசதி, ஊதியம் முறையாக வழங்கப்படுவதை உறுதி செய்திட வேண்டும்.

தூய்மை பணியாளர்களின் குடியிருப்புகளில் தூய்மை பணியாளர்களின் குறைகளை கேட்டறிந்து 100 சதவீதம் தீர்வு காண வேண்டும். அவர்களது வீடு, குழந்தைகள் கல்வி, குடியிருப்பு பகுதியில் குடிநீர், மின்சாரம் போன்ற அடிப்படை வசதிகளை மேம்படுத்த நடவடிக்கைகள் மேற்கொள்ள வேண்டும். தூய்மைப் பணியாளர்களின் நலனை கருத்தில் கொண்டு அவர்களின் தேவைகளை அறிந்து உடனுக்குடன் நிறைவேற்ற இவ்வாணையத்தின் மூலம் நடவடிக்கை எடுத்து வருகிறது.

மாநகராட்சி, நகராட்சிகள், பேரூராட்சிகள் மற்றும் ஊராட்சிகளின் தூய்மை பணியாளர்களுக்கான ஊதியம் தங்கு தடையின்றி வழங்கப்பட்டு வருவதையும், நேரடியாக வங்கிக்கணக்கிற்கு வரவு வைக்கப்படுகிறதா? என்பதையும் அலுவலர்கள் உறுதி செய்ய வேண்டும். தூய்மை பணியாளர்களின் ஆரோக்கியத்தை கருத்தில் கொண்டு, கட்டாயமாக மருத்துவ முகாம் நடத்த வேண்டும்.

வருடத்திற்கு ஒருமுறை மருத்துவ முகாம் நடத்தப்பட்டு அவர்களுக்கு முழு உடல் பரிசோதனை செய்ய வேண்டும். மேலும், அவர்களது குழந்தைகளுக்கு சிறந்த கல்வி கிடைப்பதை உறுதி செய்திட வேண்டும். தூய்மை பணியாளர்களின் குழந்தைகள் சுயத்தொழில் தொடங்க அரசு கடனுதவி வழங்குகிறது. தூய்மை பணியாளர்களின் மீது தனி கவனம் செலுத்தி, அரசின் திட்டங்கள் அனைத்தும் சென்றடைவதை அலுவலர்கள் உறுதி செய்ய வேண்டும்.

தூய்மை பணியாளர்களுக்கான பி.எப், இ.எஸ்.ஐ போன்றவை முறையாக பிடித்தம் செய்யப்படுவது குறித்து தகவல் அளிக்க வேண்டும். ஒப்பந்த முறையில் தூய்மை பணியாளர்களை பணியில் ஈடுபடுத்தும் தனியார் நிறுவனங்கள் அவர்களுக்கான பாதுகாப்பு கவசங்கள், கையுறைகள், மருத்துவ வசதிகளை அளிக்க வேண்டும். இதில் விதிமுறைகளை மீறும் நிறுவனங்கள் மீது நடவடிக்கை எடுக்கப்படும்.

ஈரோடு மாநகராட்சியில் நான்கு மண்டல அலுவலகங்களிலும் தூய்மை பணியாளர்கள் தங்களது குறைகளை தெரிவிக்க புகார் பெட்டி வசதி ஏற்பாடு செய்யப்பட்டுள்ளது. மேலும், ஈரோடு மாநகராட்சியில் பணிபுரியும் தூய்மை பணியாளர்களுக்கு போதை ஒழிப்பு விழிப்புணர்வு கூட்டம் கடந்த மே 29ம் தேதி, ஜூன் 8ம் தேதி மற்றும் 14ம் தேதிகளில் நடத்தப்பட்டுள்ளது. ஈரோடு மாநகராட்சிக்கு உட்பட்ட பகுதிகளில் தூய்மை பணியாளர்களுக்கு தகுந்த பயிற்சிகள், போதுமான பாதுகாப்பு உபகரணங்கள் வழங்கப்பட்டு, தடுப்பு ஊசிகள் மற்றும் மருத்துவ பரிசோதனைகள் மேற்கொள்ளப்பட வேண்டும்.

மேலும், தூய்மை பணியாளர்களுக்கு ஷூ அல்லது காலணி, மழைக்காலங்களில் ரெயின் கோட் வழங்கிட நடவடிக்கை எடுக்க வேண்டும். மேலும் அவர்கள் புகார் தெரிவிக்க 14420 என்ற எண்ணில் தொடர்பு கொள்ளலாம் எனத் தெரிவித்தார். முன்னதாக, அவர் ஈரோடு மாநகராட்சிக்கு உட்பட்ட, மரப்பாலம் ஜீவானந்தம் சாலையில், தூய்மை பணியாளர்கள் குடியிருப்பு பகுதியில் ஆய்வு மேற்கொண்டு, தூய்மை பணியாளர்களின் கோரிக்கைகளை கேட்டறிந்தார்.

இக்கூட்டத்தில், மாவட்ட காவல் கண்காணிப்பாளர் ஜவகர், கூடுதல் ஆட்சியர் (வளர்ச்சி) மனிஷ், மாவட்ட வருவாய் அலுவலர் சாந்த குமார், உதவி ஆட்சியர் (பயிற்சி) ராமகிருஷ்ணசாமி, துணை ஆணையர் (ஈரோடு மாநகராட்சி) சரவண குமார், மாவட்ட ஆட்சியரின் நேர்முக உதவியாளர் (பொது) முஹம்மது குதுரத்துல்லா, மாநகர நல அலுவலர் பிரகாஷ் உட்பட தொடர்புடைய துறை அலுவலர்கள் கலந்து கொண்டனர்.

Read more