ஈரோடு மாவட்டத்தில் நாளை (மே.20) மின்தடை ஏற்படும் பகுதிகள் அறிவிப்பு!

ஈரோடு மாவட்டத்தில் நாளை (மே.20) மின்தடை ஏற்படும் பகுதிகளின் விவரம் குறித்து மின்வாரியம் சார்பில் அறிவிக்கப்பட்டுள்ளது.

ஈரோடு மாவட்டம் சிவகிரி மற்றும் சிப்காட் II துணை மின் நிலையங்களில் நாளை (மே.20) செவ்வாய்க்கிழமை பராமரிப்பு பணிகள் நடக்கிறது. இதனால், நாளை கீழ்க்கண்ட இந்த பகுதிகளில் குறிப்பிட்ட நேரம் மின்சாரம் விநியோகம் இருக்காது என தெரிவிக்கப்பட்டுள்ளது.

சிவகிரி துணை மின் நிலையம் (காலை 9 மணி முதல் மதியம் 2 மணி வரை):- 

மின்தடை ஏற்படும் பகுதிகள்:- சிவகிரி, வேட்டுவபாளையம், காகம், கொந்தளம், மின்னப்பாளையம், பழமங்கலம், வீரசங்கிலி, கல்லாபுரம்கோட்டை, விளாங்காட்டுவலசு, எல்லக்கடை, குலவிளக்கு, காரக்காட்டுவலசு, கோவில்பாளையம், ஓலப்பாளையம், ஆயப்பரப்பு, விளக்கேத்தி, குட்டப்பாளையம், அம்மன்கோவில, தொப்பபாளையம், பெரும்பரப்பு, நம்மகவுண்டன்பாளையம், அஞ்சூர், வாழை தோட்டம், சிலுவம்பாளையம், கருக்கம்பாளையம், குருக்குவலசு, வள்ளியம்பாளையம், முத்தையன்வலசு, வள்ளிபுரம், இச்சிபாளையம், ஒத்தக்கடை, வடக்கு காரட்டுபுதுார், தெற்கு புதுப்பாளையம், கரட்டாம்பாளையம், பெருமாள்கோவில்புதுார் மற்றும் கல்வெட்டுப்பாளையம்

சிப்காட் II துணை மின் நிலையம் (காலை 9 மணி முதல் மாலை 5 மணி வரை):- 

மின்தடை ஏற்படும் பகுதிகள்:- பெருந்துறை கோட்டத்தைச் சார்ந்த சிப்காட் வளாகம் தெற்கு பகுதி மட்டும், கம்புளியம்பட்டி, சரளை, வரப்பாளையம், புளியம்பாளையம் மற்றும் காசிபில்லாம்பாளையம்.

Read more

ஈரோட்டை உலுக்கிய சிவகிரி இரட்டை கொலை வழக்கில் மூவர் கைது!

ஈரோடு மாவட்டம் சிவகிரி அருகே உள்ள மேகரையான் தோட்டம் பகுதியில் தனியாக வசித்து வந்த ராமசாமி, பாக்கியம்மாள் முதிய தம்பதி மர்ம கும்பலால் நகைக்காக படுகொலை செய்யப்பட்டனர். இக்கொலை ஈரோட்டையை உலுக்கியது.

மேற்கு மண்டல ஐ.ஜி.செந்தில்குமார், டி.ஐ.ஜி சசிமோகன் ஆகியோர் மேற்பார்வையில், ஈரோடு மாவட்ட போலீஸ் சூப்பிரண்டு சுஜாதா தலைமையில் 12-க்கும் மேற்பட்ட தனிப்படைகள் அமைக்கப்பட்டு கொலையாளிகளை பிடிக்கும் பணி தீவிரப்படுத்தப்பட்டது.

சிவகிரி, பெருந்துறை, சென்னிமலை மற்றும் அதன் சுற்றுவட்டார பகுதிகளில் கடந்த சில நாட்களாக 200-க்கும் மேற்பட்ட போலீசார் பாதுகாப்பு பணியில் ஈடுபட்டனர். சிறப்பு குழுக்கள் சி.சி.டி.வி கேமரா பதிவுகள், செல்போன் தொடர்பு பதிவுகள், தோட்டங்களில் வேலை செய்யும் உள்ளூர் மற்றும் வெளியூரை சேர்ந்த கூலி ஆட்களிடம் விசாரணை நடத்தினர்.

சந்தேக நபர்களின் நடமாட்டங்கள், கொலை, கொள்ளை மற்றும் திருட்டு வழக்குகளில் சம்பந்தப்பட்டு சிறை சென்று சமீபத்தில் வெளியில் வந்த நபர்கள், மாநிலம் முழுவதும் இது போன்று ஆதாய கொலைகளில் சம்பந்தப்பட்ட நபர்களின் விபரங்களை சேகரித்தனர்.

கூகுள் மேப் முலம் தனியாக உள்ள பண்ணை வீடுகள் கண்டறியப்பட்டு நவீன முறையில் இரவு பகலாக கண்காணிக்கப்பட்டு வருகிறது. சிவகிரியில் இருந்து 50 கிலோமீட்டர் தொலைவில் உள்ள கண்காணிப்பு கேமராக்கள் பதிவுகள் ஆய்வு செய்தனர்.

இதற்கிடையே கொலை வழக்கில் சம்பந்தப்பட்ட குற்றவாளிகளை வரும் 20ம் தேதிக்குள் கைது செய்யாவிட்டால் பா.ஜ.க. சார்பில் காலவரையற்ற உண்ணாவிரதப் போராட்டம் நடைபெறும் என்றும், அதில் முன்னாள் தலைவர் அண்ணாமலை பங்கேற்பார் என்றும் ஏற்கனவே அறிவிக்கப்பட்டு இருந்தது. இதற்கான பணிகளில் கட்சியினர் ஈடுபட்டு வந்தனர்.

இந்நிலையில், இந்த கொலை வழக்கில் திடீர் திருப்பமாக அறச்சலூர் அருகே உள்ள ராம்நகர் ஜல்லிமேடு, மேற்கு தலவுமலையை சேர்ந்த ஆச்சியப்பன் (வயது 48), அறச்சலூர் மேற்கு வீதியை சேர்ந்த மாதேஸ்வரன் (53), அறச்சலூர் அருகே உள்ள நடுப்பாளையம் மெயின் வீதியை சேர்ந்த ரமேஷ் (52) ஆகிய மூவரையும் பேரை போலீசார் பிடித்து ரகசிய இடத்தில் விசாரணை நடத்தினர். அதில் சில பரபரப்பான தகவல்கள் கிடைத்துள்ளதாக தெரிகிறது.

இதுகுறித்து போலீசார் கூறும்போது, சிவகிரி தம்பதி கொலை வழக்கில் போலீசார் இரவு பகல் பாராமல் குற்றவாளிகளை பிடிக்கும் பணியில் தீவிரமாக ஈடுபட்டு வந்தனர். நூற்றுக்கும் மேற்பட்ட சி.சி.டி.வி. கேமராக்களை ஆய்வு செய்ததில் மூவரை பிடித்து விசாரணை நடத்தினோம்.

இதைத் தொடர்ந்து, அவர்களை கைது செய்தோம். இந்தக் கொலை வழக்கில் மேலும் சிலருக்கு தொடர்பு இருப்பது தெரியவந்துள்ளது. அவர்கள் குறித்தும் விசாரணை நடைபெற்று வருகிறது. விசாரணை முடிவில் தான் முழு தகவலும் தெரிய வரும் என்றனர்.

மேலும் பிடிபட்ட 3 பேரிடம் பல்லடத்தில் நடைபெற்ற கொலை, கொள்ளையிலும் தொடர்பு உள்ளதா என்ற ரீதியில் போலீசார் விசாரணை நடத்தி வருகின்றனர். இதனால் இந்த கொலை வழக்கு மேலும் சூடுபிடிக்க தொடங்கியுள்ளது.

Read more

ஈரோட்டில் ஏசி, பிரிட்ஜ், வாஷிங் மெசின் பழுது நீக்க இலவசப் பயிற்சி: மே.26ல் துவக்கம்!

இதுகுறித்து கனரா வங்கி கிராமப்புற சுயவேலைவாய்ப்பு பயிற்சி நிலையம் சார்பில் வெளியிட்டுள்ள அறிவிப்பு:-

ஈரோடு மாவட்டம் சித்தோடு அருகே உள்ள கனரா வங்கி கிராமப்புற சுயவேலைவாய்ப்பு பயிற்சி நிலையம் சார்பில், வரும் மே 26ம் தேதி ஏசி, பிரிட்ஜ், வாஷிங் மெசின் மற்றும் வீட்டு உபயோகப் பொருட்கள் பழுது நீக்குதல் தொடர்பான இலவச பயிற்சி வகுப்பு துவங்குகிறது.

இந்த பயிற்சியானது மே 26ம் தேதி முதல் ஜூன் 30ம் தேதி வரை 30 நாட்கள் நடைபெறவுள்ளன. பயிற்சிக்கு எவ்வித கட்டணமும் செலுத்த தேவையில்லை. காலை 9:30 மணி முதல் மாலை 5:30 மணி வரை பயிற்சி வகுப்பு நடைபெறும். ஆண், பெண் இருபாலரும் கலந்து கொள்ளலாம்.

பயிற்சி, சீருடை, உணவு ஆகியவை இலவசமாக வழங்கப்படும். பயிற்சி முடிவில் சான்றிதழ் வழங்கப்படும். ஈரோடு மாவட்டத்தைச் சேர்ந்த 18 முதல் 45 வயதுக்கு உட்பட்டவர்கள் மட்டும் பயிற்சியில் கலந்து கொள்ள அனுமதிக்கப்படுவார்கள்.

மேலும், வறுமைக்கோட்டுக்கு கீழ் உள்ளவர்கள், 100 நாள் வேலைத் திட்டப் பணியாளர்கள் மற்றும் அவர்களது குடும்ப உறுப்பினர்களும் இப்பயிற்சியில் கலந்து கொள்ளலாம். இதற்கான முன்பதிவு தற்போது நடக்கிறது.

இப்பயிற்சியானது, கனரா வங்கி கிராமப்புற சுய வேலைவாய்ப்பு பயிற்சி நிலையம், அரசினர் பொறியியல் கல்லூரி(IRTT) சாலை, வாசவி காலேஜ் அருகில், சித்தோடு, ஈரோடு-638316 என்ற முகவரியில் நடைபெறுகிறது.

விருப்பமுள்ளவர்கள் 0424-2400338 என்ற தொலைபேசி எண் அல்லது 8778323213, 7200650604 என்ற கைப்பேசி எண்ணில் முன்பதிவு செய்துகொள்ளலாம் தெரிவிக்கப்பட்டுள்ளது.

Read more

ஈரோடு: சிவகிரி அருகே நாயின் கழுத்தில் ஏற்பட்ட காயத்தால் பீதி; போலீசார் விளக்கம்!

சிவகிரி அருகே நாயின் கழுத்தில் ஏற்பட்ட காயத்தால் பொதுமக்கள் பீதியடைந்த நிலையில், இதுதொடர்பாக போலீசார் விளக்கம் அளித்துள்ளனர். 

ஈரோடு மாவட்டம் சிவகிரி அருகே உள்ள சின்னியம்பாளையத்தில் வேல்ராஜ் என்பவருக்கு சொந்தமான தோட்டத்தில் வசித்து வரும் மணி என்பவர் குடும்பத்துடன் வசித்து வருகிறார். இவர், நேற்று முன்தினம் காலை தனது குடும்பத்துடன் திருப்பூர் மாவட்டம் காங்கேயத்தில் உள்ள குல தெய்வ கோவிலுக்கு சென்றுவிட்டு மாலையில் திரும்பினார்.

பின்னர், நேற்று காலையில் அவர் வளர்த்து வந்த இரு நாய்களில் ஒரு நாய்க்கு கழுத்தில் காயம் ஏற்பட்டு இருந்தது. இதைப்பார்த்து, அதிர்ச்சி அடைந்தவர் சிவகிரி போலீஸ் நிலையத்துக்கு தகவல் கொடுத்தார். அங்கு போலீசார் விரைந்து சென்று விசாரணை நடத்தினர்.

இதைத் தொடர்ந்து, கால்நடை மருத்துவர் சிகிச்சை அளித்ததில், வேலியில் சிக்கியதில் நாயின் கழுத்தில் ரத்த காயம் ஏற்பட்டதும் தெரிய வந்தது. சிவகிரி அருகே தம்பதி கொலையால் பீதி அடைந்துள்ள மக்களுக்கு, நாயின் கழுத்தில் காயம் ஏற்பட்ட நிலையில் அதை கொல்ல முயற்சி என பரவிய தகவல் பீதியை ஏற்படுத்தியிருந்தது. இதனால் நாயை யாரும் அடித்து காயப்படுத்தவில்லை என்பது உறுதியானதாக மாவட்ட காவல் துறை சார்பில் விளக்கம் அளிக்கப்பட்டுள்ளது .

Read more

தாளவாடி அருகே எஸ்.எஸ்.எல்.சி. தேர்வில் குறைந்த மதிப்பெண்கள் பெற்றதால் மாணவி தற்கொலை!

தாளவாடி அருகே எஸ்.எஸ்.எல்.சி. தேர்வில் குறைந்த மதிப்பெண்கள் பெற்ற மாணவி தூக்கிட்டு தற்கொலை செய்து கொண்டார். 

ஈரோடு மாவட்டம் சத்தியமங்கலம் அடுத்த தாளவாடி அருகே உள்ள மல்குத்திபுரம் தொட்டியை கிராமத்தை சேர்ந்தவர் மகேஷ். தொழிலாளி. இவரது மகள் ஜோதி (15). இவர் தாளவாடியில் உள்ள அரசு மேல்நிலைப் பள்ளியில் படித்து எஸ்.எஸ்.எல்.சி. தேர்வு எழுதியிருந்தார்.

நேற்று தேர்வு முடிவு வெளியானதில் மாணவி ஜோதி தேர்ச்சி பெற்று 500-க்கு 307 மதிப்பெண்கள் பெற்றார். இருப்பினும், குறைந்த மதிப்பெண்கள் பெற்றதால் மனமுடைந்த ஜோதி இன்று வீட்டில் தூக்குப்போட்டு தற்கொலை செய்து கொண்டார். இதுகுறித்து தாளவாடி போலீசார் வழக்குப்பதிவு செய்து விசாரணை நடத்தி வருகின்றனர்.

Read more

சத்தியமங்கலம் வட்டத்தில் வட்டத்தில் வரும் மே.21ம் தேதி 'உங்களைத் தேடி உங்கள் ஊரில்' திட்ட முகாம்!

ஈரோடு மாவட்டம் சத்தியமங்கலம் வட்டத்தில் வரும் மே.21ம் தேதி 'உங்களைத் தேடி உங்கள் ஊரில் ' திட்ட முகாம் நடைபெற உள்ளது என்று மாவட்ட ஆட்சியர் ராஜ கோபால் சுன்கரா தெரிவித்துள்ளார்.

தமிழ்நாடு முதலமைச்சர் மக்களை நாடி, மக்கள் குறைகளைக் கேட்டு, உடனுக்குடன் தீர்வு காண அரசு இயந்திரம் களத்திற்கே வரும் "உங்களைத் தேடி, உங்கள் ஊரில்" என்ற புதிய திட்டத்தினை அறிவித்துள்ளார்.

இந்த திட்டத்தின் படி, ஒவ்வொரு மாவட்ட ஆட்சியரும், இனி ஒவ்வொரு மாதமும் மூன்றாவது புதன் கிழமை ஒரு நாள் வட்ட அளவில் தங்கி, களஆய்வில் ஈடுபட்டு, அரசு அலுவலகங்களை ஆய்வு செய்து, மக்களின் சேவைகளும், தங்குதடையின்றி மக்களைச் சென்றடைவதை உறுதி செய்யவேண்டும் என்று அறிவுறுத்தியுள்ளார்.

இதன்படி, ஈரோடு மாவட்ட ஆட்சியர் மற்றும் மாவட்ட அளவிலான இதர உயர் அலுவலர்கள் ஈரோடு மாவட்டம், சத்தியமங்கலம் வட்டத்தில் வருகிற மே 21ம் தேதி காலை 9 மணிமுதல் மறுநாள் (22ம் தேதி) காலை 9 மணி வரை தங்கி, பல்வேறு அரசுத் துறைகளின் மூலம் செயல்படுத்தப்பட்டு வரும் திட்டங்கள் (சேவைகள்) ஆகியவற்றின் செயல்பாடுகள் குறித்து களஆய்வு மேற்கொள்ள உள்ளனர்.

கள ஆய்வின்போது பெறப்படும் கருத்துக்களின் அடிப்படையில் மாவட்ட ஆட்சியர் மேம்பட்ட சேவைகள் வழங்குதல் மற்றும் திட்டங்களை விரைவுப்படுத்துதல் தொடர்பாக உரிய தீர்வு காண்பார். மேலும், 21ம் தேதி அன்று மாலை 4.30 மணிமுதல் 6 மணிவரை சத்தியமங்கலம் வருவாய் வட்டாட்சியர் அலுவலகத்தில் மக்களைச் சந்தித்து அவர்களின் குறைகளைக் கேட்டறிந்து பொதுமக்களிடமிருந்து கோரிக்கை மனுக்களை பெற உள்ளார்.

எனவே, அரசின் சேவைகளை எளிதாகவும், விரைவாகவும் பெற்றிட ஏதுவாக இந்த முகாமினை பொதுமக்கள் நல்ல முறையில் பயன்படுத்திக் கொள்ள வேண்டும் என ஈரோடு மாவட்ட ஆட்சியர் ராஜ கோபால் சுன்கரா தெரிவித்துள்ளார்.

Read more

இணைந்த விரல்களை அறுவை சிகிச்சையால் பிரித்து ஈரோடு அரசு தலைமை மருத்துவமனை மருத்துவர்கள் சாதனை!

அந்தியூரை சேர்ந்த சிறுமியின் இணைந்த விரல்களை அறுவை சிகிச்சையால் பிரித்து ஈரோடு அரசு தலைமை மருத்துவமனை மருத்துவர்கள் சாதனை படைத்தனர்.

ஈரோடு மாவட்டம் அந்தியூரை சேர்ந்த கோபிகா (வயது 14) என்ற சிறுமிக்கு 2 கைகளிலும் இருந்த விரல்கள் இணைந்திருந்தன. இதனால் அந்த சிறுமி தன்னுடைய அன்றாட வேலைகளை கூட செய்ய முடியாமல் சிரமப்பட்டார்.

இதையடுத்து, அறுவை சிகிச்சைக்காக சிறுமி ஈரோடு அரசு தலைமை மருத்துவமனையில் சேர்க்கப்பட்டார். இதைத்தொடர்ந்து, அரசு மருத்துவமனை மருத்துவர்கள் பிளாஸ்டிக் அறுவை சிகிச்சை நிபுணர்களின் ஆலோசனையை பெற்று அரசு மருத்துவமனையிலேயே சிறுமிக்கு அறுவை சிகிச்சை செய்து, விரல்களை வெற்றிகரமாக பிரித்து சாதனை படைத்தனர்.

தற்போது சிறுமி நலமுடன் உள்ளார். இணைந்த விரல்களுடன் சிரமப்பட்ட சிறுமிக்கு வெற்றிகரமாக அறுவை சிகிச்சை செய்த மருத்துவர்களை சிறுமியின் பெற்றோர் பாராட்டினார்கள். சிறுமி கோபிகாவும் மகிழ்ச்சியுடன் நன்றி தெரிவித்தார்.

Read more