பண்ணாரி மாரியம்மன் கோவில் குண்டம் திருவிழா: கோவை சரக டிஐஜி ஆய்வு

ஈரோடு மாவட்டம் சத்தியமங்கலம் அடுத்துள்ள அடர்ந்த வனப்பகுதியில் பிரசித்தி பெற்ற பண்ணாரி மாரியம்மன் கோவில் அமைந்துள்ளது. இக்கோவிலில் பங்குனி மாத குண்டம் திருவிழா ஏப்ரல் 7 மற்றும் 8ம் தேதிகளில் நடைபெற உள்ளது.

இந்த நிலையில், திருவிழா பாதுகாப்பு ஏற்பாடுகள் குறித்து கோவை சரக டிஐஜி சசிமோகன் நேற்று (மார்ச் 29) நேரில் பார்வையிட்டு ஆய்வு மேற்கொண்டார். அப்போது, கோவில் வளாகத்தில் ஏற்கனவே பொருத்தப்பட்டுள்ள சிசிடிவிகள், திருவிழாவில் புதிதாக பொருத்தப்படும் சிசிடிவி கேமராக்கள் பொருத்துதல் குறித்து அதிகாரிகளிடம் கேட்டறிந்தார்.

தொடர்ந்து, திருவிழாவில் பக்தர்கள் குண்டம் இறங்குவதற்காக அமைக்கப்பட்டு வரும் பந்தல் மற்றும் வரிசை தடுப்பினை பார்வையிட்டு திருவிழாவில் பக்தர்கள் குண்டம் இறங்க அனுமதிக்கப்படுவது குறித்து கேட்டறிந்தார்.

மேலும், கோவில் வளாகத்தில் வாகனங்கள் நிறுத்துமிடம், போக்குவரத்து மாற்றம் உள்ளிட்ட பல்வேறு ஏற்பாடுகள் குறித்து ஆய்வு மேற்கொண்டார். இந்த ஆய்வின் போது, ஈரோடு மாவட்ட போலீஸ் சூப்பிரண்டு சுஜாதா, சத்தியமங்கலம் துணை போலீஸ் சூப்பிரண்டு முத்தரசு, கோவில் துணை ஆணையர் மேகனா ஆகியோர் உடனிருந்தனர்.

Read more

மொடக்குறிச்சி அருகே லாரி மீது கார் மோதிய விபத்தில் தொழில் அதிபர் பலி

ஈரோடு வீரப்பன்சத்திரம் பகுதியை சேர்ந்தவர் மூர்த்தி (வயது 49). தொழில் அதிபர். இவர் நேற்று முன்தினம் நள்ளிரவு ஈரோடு-முத்தூர் மெயின் ரோட்டில் சின்னியம்பாளையம் பகுதியில் காரில் சென்று கொண்டு இருந்தார். அப்போது, சின்னியம்பாளையம் கூட்டுறவு வங்கி அருகே சென்ற போது, எதிரே விறகு லோடுடன் வந்த லாரி மீது நேருக்கு நேர் பயங்கரமாக மோதினார்.

இந்த விபத்தில் கார், லாரியின் முன்பகுதி அப்பளம் நொறுங்கியது. இதில், மூர்த்தியும், லாரியை ஓட்டி வந்த திண்டுக்கல் மாவட்டம் ரெட்டியார் சத்திரம் தாத்தையங்கார் கோட்டையை சேர்ந்த பெருமாள் என்பவரும் படுகாயம் அடைந்தனர். சத்தம் கேட்டு ஓடி வந்த அக்கம் பக்கத்தினர் மூர்த்தியை மீட்டு சிகிச்சைக்காக ஈரோட்டில் உள்ள தனியார் மருத்துவமனைக்கு ஆம்புலன்சில் அனுப்பி வைத்தனர்.

அங்கு பரிசோதனை செய்த மருத்துவர்கள் மூர்த்தி உயிரிழந்து விட்டதாக தெரிவித்தனர். பெருமாள் ஈரோடு அரசு தலைமை மருத்துவமனையில் சிகிச்சை பெற்று வருகிறார். இதுகுறித்து மொடக்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர்.

Read more

பவானி: அம்மாபேட்டை அருகே குட்டையில் மூழ்கி 7ம் வகுப்பு மாணவன் உயிரிழப்பு!

ஈரோடு மாவட்டம் பவானி அடுத்த அம்மாபேட்டை அருகே உள்ள கோணமூக்கனூர் இந்திரா நகர் பகுதியை சேர்ந்தவர் பிரகாஷ். வெல்டிங் தொழிலாளி. இவருடைய மகன் பிரவேஷ் (வயது 12). வெள்ளித்திருப்பூரில் உள்ள அரசு மேல்நிலைப்பள்ளியில் பிரவேஷ் 7ம் வகுப்பு படித்து வந்தான்.

இந்த நிலையில், நேற்று பள்ளி விடுமுறை என்பதால் பிரவேஷ் தனது நண்பருடன் பூனாச்சி- வெள்ளித்திருப்பூர் சாலையில் உள்ள குண்டாங்கல்மேடு பகுதியில் உள்ள குட்டைக்கு சென்றுள்ளான். பின்னர், பிரவேஷ் மட்டும் குட்டையில் இறங்கி ஆழமான பகுதியில் குளித்ததாக தெரிகிறது.

அப்போது, நீச்சல் தெரியாததால் பிரவேஷ் தண்ணீரில் மூழ்கினான். இதைத் தொடர்ந்து, பாலத்தின் மேல் சைக்கிள் ஓட்டிக் கொண்டிருந்த அவனுடைய நண்பர் சத்தமிடவே, அருகில் இருந்தவர்கள் குட்டையில் மூழ்கிய பிரவேசை மயங்கிய நிலையில் மீட்டனர்.

அதன்பின்னர், அவனை சிகிச்சைக்காக ஆம்புலன்ஸ் மூலம் அந்தியூர் அரசு மருத்துவமனைக்கு அனுப்பி வைத்தனர். அங்கு மருத்துவர்கள் பரிசோதித்து விட்டு பிரவேஷ் ஏற்கனவே உயிரிழந்து விட்டதாக தெரிவித்தனர்.

இதுகுறித்து அம்மாபேட்டை போலீசார் வழக்குப்பதிவு செய்து விசாரணை நடத்தி வருகின்றனர். இந்த சம்பவம் அந்த பகுதியில் சோகத்தை ஏற்படுத்தியுள்ளது.

Read more

நடப்பாண்டில் முதல் முறையாக ஈரோட்டில் 103.28 டிகிரி பரான்ஹீட் வெயில் பதிவு

கோடை காலம் என்பது பொதுவாக ஏப்ரல் மாதம் 2வது வாரத்தில் தொடங்கி ஜூன் மாதம் முதல் வாரத்தில் முடிவடையும். கோடை காலம் தொடங்க இன்னும் 15 நாட்களுக்கு மேலாக இருக்கும் நிலையில் தற்போதே தமிழகத்தின் பல்வேறு மாவட்டங்களில் வெயிலின் தாக்கம் நாளுக்கு நாள் அதிகரித்து வருகிறது.

குறிப்பாக, ஈரோடு மாவட்டத்தில் கடந்த 15 நாட்களுக்கும் மேலாக வெயிலின் தாக்கம் கடுமையாக இருந்து வருகிறது. நாளுக்கு நாள் வெயிலின் அளவு புதிய உச்சத்தில் பதிவாகி வருகிறது. மேலும், தினமும் 100 டிகிரி பாரன்ஹீட் மேல் வெயில் பதிவாகி வருவதால் மக்கள் கடும் அவதி அடைந்து வருகின்றனர்.

ஈரோடு மாவட்டத்தில் காலை 11 மணி முதல் மதியம் 4 வரை வெயில் சுட்டெரிக்கிறது. இதனால் வாகன ஓட்டிகள் கடும் அவதி அடைந்து வருகின்றனர். இதேபோல் வீடுகளில் கடுமையான புழுக்கம் நிலவி வருகிறது. இந்த நிலையில், இன்று (மார்ச் 29) சனிக்கிழமை புதிய உச்சமாக 39.6 டிகிரி செல்சியஸ் (103.28 டிகிரி பாரன்ஹீட்) பதிவானது.

இதனால், மதிய நேரம் வெளியே செல்லும்போது தீப்பிடிப்பது போல் இருந்து வருகிறது. தற்போதே வெயிலின் தாக்கம் அதிகமாக இருக்கும் நிலையில் இன்னும் மே மாதத்தில் என்ன செய்யப் போகிறோம் என ஈரோடு மக்கள் புலம்பி வருகின்றனர்

Read more

சிக்கய்ய அரசு கலை மற்றும் அறிவியல் கல்லூரியின் பெயர் பலகையை திறந்து வைத்த அமைச்சர்கள்!

உயர்கல்வித்துறையின் சார்பில் ஈரோடு மாவட்டம் வீரப்பன்சத்திரம் சிக்கய்ய நாயக்கர் அரசு உதவி பெறும் கல்லூரியினை சிக்கய்ய அரசு கலை மற்றும் அறிவியல் கல்லூரியாக பெயர் மாற்றம் செய்து பெயர் பலகையினை வீட்டுவசதி மற்றும் நகர்ப்புற வளர்ச்சித்துறை அமைச்சர் சு.முத்துசாமி மற்றும் உயர்கல்வித்துறை அமைச்சர் டாக்டர்.கோவி.செழியன் ஆகியோர் இன்று (மார்ச் 29) திறந்து வைத்தனர்.

பின்னர், அமைச்சர்கள் முத்துசாமி, கோவி.செழியன் செய்தியாளர்களிடம் தெரிவித்ததாவது:- தமிழ்நாடு முதலமைச்சரின் உயர்கல்வித்துறையின் மீது கொண்ட அக்கறையின் காரணமாக நீண்ட நாள்களாக பாதுகவரால் நிர்வகிக்கப்பட்டு வந்த சிக்கய்ய நாயக்கர் கல்லூரி, அரசு கல்லூரியாக மாற்றிட தமிழ்நாடு சட்டமன்றத்தில் சட்டத் திருத்தம் மேற்கொள்ளப்பட்டது.

அதனைத் தொடர்ந்து, மாண்புமிகு தமிழ்நாடு முதலமைச்சர் அவர்களின் வழிகாட்டுதலின்படி, குடியரசுத் தலைவரை நேரில் சந்தித்து மசோதாவிற்கு நீண்ட காலமாக நிலுவையில் உள்ளதை விளக்கி ஒப்புதல் வழங்கிட கோரிக்கை வைத்து ஒப்புதல் பெறப்பட்டது. மேலும், இடையில் இருந்த இடர்பாடுகள் களையப்பட்டு, தற்பொழுது சிக்கய்ய அரசு கலை மற்றும் அறிவியல் கல்லூரி, ஈரோடு என்ற பெயரில் இன்று முதல் அழைக்கப்படுகிறது.

சிக்கய்ய அரசு கலை மற்றும் அறிவியல் கல்லூரி, ஈரோடு என்ற பெயரில் அரசு கல்லூரியாக செயல்படும். இக்கல்லூரி 11 இளநிலைப் பாடப்பிரிவுகளும், 3 முதுநிலைப் பாடப்பிரிவுகளும், 11 ஆராய்ச்சி படிப்புகளுடன் செயல்பட்டு வருகிறது. மேலும் இளநிலை பிரில் 376 ஆண்கள், 567 பெண்கள் மற்றும் முதுநிலை பிரிவில் 32 ஆண்கள், 44 பெண்கள் என 1019 மாணவ, மாணவியர்கள் பயின்று வருகின்றனர்.

குடும்பத்தையே பல்கலைக்கழகமாக நடத்தும் திறமை பெற்ற பெண்களால் பொது வாழ்விலும் சமுதாயத்திலும் வெற்றி மேல் வெற்றிகளைக் குவிக்க முடியும் என்பதற்கு எடுத்துக்காட்டுதான், இக்கல்லூரியில் மாணவியர்கள் சேர்க்கை விகிதம். புதுமைப்பெண் திட்டத்தின் மூலம் மாணவியர்களின் சேர்க்கை அதிகரித்துள்ளது. இக்கல்லூரியில் பயிலும் மாணவ/மாணவிகள் அரசின் நலத்திட்ட உதவிகள் பெற்று வருவது அரசின் திட்டங்களுக்கு கிடைத்த வெற்றியாகும்.

இக்கல்லூரி அரசு கல்லூரியாக மாற்றம் செய்யப்பட்டுள்ளதால் இனிவரும் கல்வியாண்டுகளில் மாணவர்களின் தேவை மற்றும் விருப்பத்தின் அடிப்படையில் புதிய இளநிலை மற்றும் முதுநிலை பாடப்பிரிவுகள் தொடங்குவதற்கு ஒரு வாய்ப்பாக அமையும். மாணவர் சேர்க்கை எண்ணிக்கை தற்போதுள்ள 1,019 என்ற நிலைமாறி வரும் கல்வியாண்டுகளில் இக்கல்லூரியியல் உயர்கல்வி பயிலும் மாணவர்களின் சேர்க்கை எண்ணிக்கை பன்மங்கு உயர்வதற்கு வாய்ப்பாக அமைந்துள்ளது.

மேலும், இக்கல்லூரி அரசு கல்லூரியாக மாற்றப்படுவதால், பெருந்தலைவர் காமராசர் கல்லூரி மேம்பாட்டு திட்டம் மற்றும் தமிழ்நாடு அரசின் பிற திட்டங்களின் மூலம் இக்கல்லூரிக்கு தேவையான உட்கட்டமைப்பு வசதிகளை ஏற்படுத்துவதற்கு வாய்ப்பாக அமையும்.

தமிழ்நாடு முதலமைச்சர் மற்றும் துணை முதலமைச்சர் எடுத்துக் கொண்ட முயற்சியின் காரணமாக, இக்கல்லூரியில், ரூ.10.70 கோடி மதிப்பீட்டில் உலகத் தரத்திலான விளையாட்டு மைதானம், நூலக வசதிகள் மற்றும் குடிமைப் பணிகள் தேர்வுக்கான பயிற்சி மையம் அமைக்கப்படவுள்ளது.

பேரறிஞர் அண்ணா நூற்றாண்டு நினைவு நூலகம் மற்றும் கலைஞர் நூற்றாண்டு நினைவு நூலகத்தை போல தந்தை பெரியார் பிறந்த மண்ணிலும் மிகப்பெரிய நூலகம் அமைப்பதற்கு அனைத்து விதமாக முயற்சியும் மேற்கொள்வோம். தமிழ்நாடு முதலமைச்சரும் இந்நூலகம் அமைப்பதில் மிகுந்த ஆர்த்துடன் உள்ளார்கள்.

தற்போது இக்கல்லூரியில் உள்ள உட்கட்டமைப்புகள் புதிய கட்டிடங்கள் விடுதிகள், சுற்றுச்சுவர், ஆய்வகங்கள் வகுப்பறைகள் என என்னென்ன தேவை என்பது குறித்து கல்லூரி நிர்வாகத்தின் மூலம் கருத்துக்கள் பெறப்பட்டுள்ளது. இக்கருத்துக்கள் அனைத்து தமிழ்நாடு முதலமைச்சரின் கவனத்திற்கு கொண்டு செல்லப்பட்டு, உரிய நடவடிக்கை மேற்கொள்ளப்படும். புகழ்மிக்க இக்கல்லூரி அரசு கல்லூரியாக மாற்றியிருப்பது உயர்கல்வித்துறைக்கு கிடைத்த பெருமையாகும் என தெரிவித்தனர்.

இந்நிகழ்ச்சியில், கல்லூரிக் கல்வி ஆணையர் எ.சுந்தரவல்லி, மாவட்ட ஆட்சியர் ராஜ கோபால் சுன்கரா, ஈரோடு நாடாளுமன்ற உறுப்பினர் கே.இ.பிரகாஷ், ஈரோடு கிழக்கு சட்டமன்ற உறுப்பினர் வி.சி.சந்திரகுமார், ஈரோடு மாநகராட்சி துணை மேயர் வே.செல்வராஜ், கோவை மண்டல இணை இயக்குநர் கல்லூரிக் கல்வி இயக்ககம் வெ.கலைச்செல்வி, கல்லூரி முதல்வர் திருக்குமரன் உட்பட தொடர்புடைய துறை அலுவலர்கள் கலந்து கொண்டனர்.

Read more

பண்ணாரி மாரியம்மன் கோவில் குண்டம் திருவிழா: சிறப்பு பேருந்துகள் இயக்க ஏற்பாடு

இதுதொடர்பாக ஈரோடு மண்டல அரசு போக்குவரத்துக் கழக பொதுமேலாளர் மோகன்குமார் வெளியிட்டுள்ள செய்திக்குறிப்பில் கூறியிருப்பதாவது:-

வருகிற ஏப்ரல் மாதம் 7 மற்றும் 8ம் தேதிகளில் ஈரோடு மாவட்டம் சத்தியமங்கலம் அருகே உள்ள பண்ணாரி மாரியம்மன் கோவில் குண்டம் திருவிழா மற்றும் 14ம் தேதி மறுபூஜை விழாவும் நடக்கிறது .

இதை முன்னிட்டு கோவை, மேட்டுப்பாளையம், திருப்பூர், ஈரோடு, கோபி, கவுந்தப்பாடி, பவானி, சத்தி, புளியம்பட்டி, மைசூர், நம்பியூர், பவானிசாகர் ஆகிய இடங்களிலிருந்து தமிழ்நாடு அரசு போக்குவரத்துக் கழக ஈரோடு மண்டலம் சார்பில் சிறப்பு பேருந்துகள் இயக்கப்பட உள்ளது. 

இவ்வாறு அதில் கூறப்பட்டுள்ளது.

Read more

மதுரையில் இருந்து ரகசியமாக செங்கோட்டையன் ‘திடீர்’ டெல்லி பயணம்: மத்திய மந்திரி நிர்மலா சீதாராமனை சந்தித்ததாக தகவல்

மதுரையில் இருந்து ரகசியமாக செங்கோட்டையன் டெல்லி சென்றார். அங்கு, மத்திய மந்திரி நிர்மலா சீதாராமனை சந்தித்ததாக தகவல் வெளியாகி உள்ளது.

அதிமுக பொதுச்செயலாளரும், முன்னாள் முதலமைச்சருமான எடப்பாடி பழனிசாமி கடந்த சில நாட்களுக்கு முன்பு திடீரென டெல்லி சென்று மத்திய மந்திரி அமித்ஷாவை சந்தித்து பேசியது தமிழக அரசியலில் பெரும் பரபரப்பை ஏற்படுத்தியது.

இந்த சூழ்நிலையில், அதிமுக மூத்த தலைவரும், முன்னாள் அமைச்சருமான செங்கோட்டையன் திடீரென டெல்லிக்கு ரகசியமாக சென்றதாக தகவல்கள் வெளியாகி இருக்கிறது.

தனது இந்த பயணம் வெளியில் யாருக்கும் தெரியாமல் இருக்க அவர் சென்னையில் இருந்து மதுரைக்கு சென்று அங்கிருந்து விமானம் மூலம் டெல்லி சென்றார். அங்கு அவர் மத்திய மந்திரி நிர்மலா சீதாராமனை சந்தித்து பேசியதாக தகவல்கள் வெளியாகி இருக்கிறது.

இன்று காலை செங்கோட்டையன் விமானம் மூலம் டெல்லியில் இருந்து மதுரைக்கு திரும்பினார். பின்னர் அவர் காரில் சொந்த ஊரான கோபிசெட்டிபாளையத்துக்கு சென்றார். அவரது இந்த ரகசிய டெல்லி பயணம் பல்வேறு சந்தேகங்களை கிளப்பி இருக்கிறது.

இதையடுத்து அதிமுகவில் என்ன நடக்கிறது என்பது பற்றி செங்கோட்டையனிடம் கருத்து கேட்பதற்காக அவரை டெல்லிக்கு அழைத்தாக கூறப்படுகிறது. அதன் பேரிலே, அவர் டெல்லிக்கு சென்று மத்திய மந்திரி நிர்மலா சீதாராமனை சந்தித்து பேசியதாக டெல்லி வட்டாரங்கள் தெரிவிக்கின்றன.

இது குறித்து கட்சி நிர்வாகிகளிடம் கேட்ட போது அது பற்றி எங்களுக்கு எந்த தகவலும் தெரியாது என தெரிவித்தனர். எடப்பாடி பழனிசாமிக்கு தெரியாமல் செங்கோட்டையன் டெல்லி சென்றது குறித்து அதிமுகவினர் பரபரப்பாக விவாதித்து வருகின்றனர்.

Read more